|
Bakıdakı 132-134 nömrəli Təhsil Kompleksində
Lətif Kərimov adına Azərbaycan Xalçası və Xalq
Tətbiqi Sənəti Dövlət Muzeyi "EkoMədəniyyət"
Mərkəzi ilə birgə 15 Aprel - Ümumdünya Gənclərin
Ekologiyaya Xidmət Gününə həsr olunmuş "Təbiətdən
ilmələrə" mövzusunda tədbir keçirmişdir.
AzərTAc xəbər verir ki, tədbirdə çıxış edən
təhsil kompleksinin direktoru Sara Xanlarova
hazırda dünyanın diqqət mərkəzində olan ekoloji
problemlərdən danışmış, tədbirin əhəmiyyətini
vurğulamışdır.
Bildirmişdir ki, 15 Aprel - Ümumdünya Gənclərin
Ekologiyaya Xidmət Günü 1988-ci ildən dünyanın
100-dən artıq ölkəsində qeyd edilir. Gənclərə və
uşaqlara ətraf mühitə xidmətin mənasını aşılayan
bu kampaniya təbiətin mühafizəsi, ekoloji
tarazlığın bərpası, təbii ehtiyatlardan səmərəli
istifadəyə dair ekoloji maarifləndirmə işinin
həyata keçirilməsində böyük əhəmiyyət kəsb edir.
Kompleksin biologiya müəllimi Xanım Muradova
Prezident İlham Əliyevin ölkəmizdə ekoloji
tarazlığın bərpasına yönəlmiş fərman və
sərəncamları, "Ekologiya ili"nin yekunları və "Adama
bir ağac əkək" kampaniyası barədə ətraflı
məlumat vermişdir.
Beynəlxalq ekspert, Azərbaycan Turizm
İnstitutunun müəllimi Gila Altmann şagirdlər
qarşısında "Azərbaycanın ekoloji marşrutları"
mövzusunda məruzə ilə çıxış etmişdir.
Azərbaycanın ekoloji problemləri barədə məlumat
verən Beynəlxalq Ekoenergetika Akademiyasının
professoru, ekoloq-ekspert Lətifə Hüseynova "EkoMədəniyyət"
Mərkəzinin yuxarı sinif şagirdləri arasında
biomüxtəlifliyə, "Qırmızı kitab"a daxil edilmiş
flora və fauna növlərinə həsr olunmuş esse və
təqdimatlar müsabiqəsinin qaliblərinə
sertifikatlar təqdim etmişdir.
Tədbirdə mövzu ilə bağlı videoçarx, slaydlar
təqdim olunmuş, həmçinin şagirdlərin ifasında "Əlbir
olaq" musiqili-ekoloji tamaşa göstərilmişdir.
AzərTAc |
