Ölkədə
həyata keçirilən kurikulum islahatı yeni nəslin
biliklərə, bacarıq və qabiliyyətlərə
yiyələnməsinə böyük imkan yaradır.
Məlum olduğu kimi, yeni təlim metodlarının əsas
vəzifəsi şagirdləri yaradıcı düşünmə, müstəqil
öyrənmə, təşəbbüskarlıq, tətbiq və tədqiqatçılıq
bacarıqlarına yiyələndirməkdir. Bu məqsədin əldə
olunması isə hər bir müəllimdən daim yaradıcı
axtarışlar aparmağı, öz üzərində işləyərək
yenilikləri öyrənməyi və tətbiq etməyi tələb
edir. Bunu nəzərə alaraq mən təhsil sahəsində
gedən dəyişiklikləri ardıcıl izləyir,
öyrəndiklərimi öz işimdə tətbiq etməyə çalışır,
dərslərimi interaktiv təlim üsullarının tətbiqi
əsasında qururam.
Yeni təlim üsulları ilə işləmək işimdə ciddi
problemlər yaratmır. Çünki inteqrativ təlim
metodları ilə 2003-cü ildən tanışam. Belə ki,
2003-2004-cü tədris ilində Təhsil Nazirliyi
tərəfindən keçirilən fəal təlimlə bağlı "Pedaqoji
mühazirələr"də I yeri tutaraq diploma layiq
görülmüşəm.
Pedaqoji fəaliyyətə başladığım dövrdən daim
axtarışdayam. Fikrimcə, müəllim yaradıcı və
təşkilatçı olmalıdır ki, fəal təlimin forma və
üsullarından düzgün istifadə edə bilsin. Daim
yeniliklər axtarışındayam. Çalışıram həmişə
dərslərimi günün tələbləri səviyyəsində qurum.
Yeniliklərdən bəhrələnmək üçün fəal təlim
metodları üzrə keçirilən seminar, treninq və
kurslarda iştirak edərək peşəkarlıq səviyyəmi
artırmağa səy göstərirəm, 2006-cı ildə Təhsil
Nazirliyi və YUNİSEF-in apardığı "Fəal təlim"
treninqdə iştirak edərək müasir tələblərə cavab
verən dərslər qurmağı öyrənmişəm. Kurslarda
öyrəndiklərimi işimdə tətbiq edirəm. Bu cür
dərslər şagirdlərdə müşahidə etmə, öz
fikirlərini dəqiq ifadə etmə, nəticə çıxarmaq,
bir-birini dinləmək, müqayisə etmək və s. kimi
bacarıqları formalaşdırır, şagirdin məntiqi,
tənqidi və yaradıcı təfəkkürü inkişaf edir.
Məktəbdə müntəzəm olaraq nümunəvi dərslər təşkil
edir və metodbirləşmə iclaslarında öz təcrübəmi
başqa müəllimlərlə bölüşürəm.
Bununla kifayətlənməyib rayonumuzun müxtəlif
məktəblərində (Küçəkənd orta, Boyat kənd orta
məktəblərində) nümunə dərsləri keçərək
həmkarlarımla təcrübə mübadiləsi edirəm.
Şəlalə HƏSƏNOVA,
Ucar şəhər 3 nömrəli
tam
orta məktəbin
ibtidai sinif müəllimi |