Oktyabrın 15-də Bakı Dövlət Universitetində Yeni Azərbaycan Partiyasının yaranmasının 20 illiyi ilə əlaqədar olaraq YAP Yasamal rayonu ərazi ilk partiya təşkilatlarının futbol komandaları arasında açılış mərasimi keçirilib.

Qonaqları və tədbir iştirakçılarını salamlayan rektor, akademik Abel Məhərrəmov ümummilli lider Heydər Əliyevin tarixi xidmətlərindən danışıb, ölkə həyatında - siyasətində, iqtisadiyyatında, elm və təhsilində, digər sahələrdə həyata keçirilən islahatlardan, möhtəşəm layihələrdən bəhs edib. lXoşbəxt o xalqdır ki, onun ümummilli lideri var, xalq o vaxt daha da xoşbəxtdir ki, həmin siyasi kurs ölkədə uğurla davam etdirilir» deyən rektor Azərbaycanın bütün nailiyyətlərinin bu böyük şəxsiyyətin adı ilə bağlı olduğunu vurğulayıb. Ulu öndərin elmin, təhsilin inkişafına, alimlərin sosial vəziyyətinin daha da yaxşılaşmasına hər zaman böyük diqqət və qayğı ilə yanaşdığı, həmin siyasi kursun bu gün Prezident İlham Əliyev tərəfindən uğurla davam etdirildiyi diqqətə çatdırılıb. Eyni zamanda, ölkəmizdə idmana göstərilən xüsusi dövlət qayğısından da söz açılıb.

Sonra yarış haqqında məlumat verilib. Bildirilib ki, mübarizə 12 komanda arasında 3 qrupda davam edəcək. Qalib komandaya 1200, 2-ci yerin qalibinə 900, 3-cü yerin qalibinə isə 600 manat pul mükafatı və hədiyyələr təqdim ediləcək.

Sonra Bakı Dövlət Universiteti və Kənd Təsərrüfatı Nazirliyinin komandaları arasında oyun başlayıb. Mübarizə 1:0 hesabı ilə BDU  təmsilçilərinin xeyrinə başa çatıb.  

BDU-nun Mətbuat və informasiya şöbəsi