|
"Bakı-2015" birinci Avropa Oyunlarının könüllüləri
danışır
Rüfanə GÜNƏŞ,
"Azərbaycan müəllimi"
[email protected]
Onlar fərqli geyimləri, müsbət enerjiləri və təbii ki,
"Bakı-2015" Avropa Oyunlarında 17 gün ərzində gördükləri
işlərlə hər kəsin diqqətini çəkməyi bacardılar. Söhbət
böyük hissəsini tələbələrin təşkil etdiyi və sayı on
mindən çox olan könüllülərdən gedir. Möhtəşəm idman
yarışında onlara bir çox vəzifənin icrası etibar edildi.
Sonda aldıqları təşəkkür də onu göstərdi ki, işlərinin
öhdəsindən layiqincə gəliblər.
Ətrafımda olan, bütün gününü bu yarışlara həsr edən
könüllülərin işlərində necə məsuliyyətli olduğu
diqqətimi çəkmişdi. Hələ bir dəfə də onların işlərin
çoxluğundan, ya da yorğunluqdan şikayətləndiyini
görməmişdim. Elə buna görə də fəaliyyətləri və oyunlarla
bağlı təəssüratlarını oxuculara çatdırmaq üçün
könüllülərin bir neçəsinə sual ünvanladım: "Artıq geridə
qalan "Bakı-2015" Avropa Oyunları sizə nə qazandırdı?"
 Turan
Vəlizadə,
Bakı Dövlət Universitetinin kimya fakültəsinin IV kurs
tələbəsi
- İlk Avropa Oyunlarında tədbir xidmətlərində komanda
üzvi idim. Fəaliyyətim Baku Christal Hallda keçirilən
voleybol yarışlarına qonaqların qəbul edilməsi,
yerləşdirilməsi, biletlərin yoxlanılmasından ibarət idi.
Qonaqların özlərini rahat hiss etməsi üçün əlimizdən
gələn köməkliyi göstərirdik.
Birinci onu qeyd etmək istəyirəm ki, belə möhtəşəm
oyunlarda iştirak etmək mənim üçün fəxrdir. Avropa
Oyunları mənə munis duyğular, gözəl komanda, dostlar,
maraqlı iş günləri, ünsiyyət qazandırdı. Həmin günlərdən
qalan foto və videolar mənim üçün əvəzolunmaz, həm də
gözəl xatirədir. Günümüz o qədər maraqlı keçirdi ki,
hətta istirahət günlərimizdə də əlavə olaraq işə
gedirdik. Oyunların nə vaxt bitəcəyini bilirdik və buna
əvvəldən heyfsilənirdik.
Yarışlara çoxlu turist gəlirdi. Söhbət əsnasında onlar
Azərbaycan barədə ağızdolusu danışırdılar. İnsanların
mehribanlığı, qonaqpərvərliyi, gülərüzlülüyü onların
diqqətini çəkmişdi. Tarixi yerlər ilə maraqlanırdılar və
yarışlardan sonra o yerlərə gedəcəklərini deyirdilər. "Bayraq
meydanı" onların diqqətini xüsusilə çəkmişdi. Bu
meydanın möhtəşəm olduğunu dəfələrlə qeyd edirdilər. Bir
də bizim formalarımızı çox bəyənmişdilər. Azərbaycanla
və Avropa Oyunları ilə bağlı suvenirlər almaq
istəyirdilər və bizdən bunları hardan əldə edə
biləcəklərini soruşurdular. Xarici qonaqlarla
əlaqələrimiz indi də davam edir.
Sonda bir şeyi də qeyd edim ki, təşkilatçılar biz
könüllülərə qarşı çox diqqətli idi. Hər bir şey ilə
vaxtlı-vaxtında təmin olunurduq. Tək şikayətimiz
oyunların tez bitməsi oldu.
 Rəhim
Yusifov,
Azərbaycan Dövlət İqtisad Universitetinin maliyyə
ixtisası, "SABAH" qrupunun III kurs tələbəsi
- Vəzifəm Bakı Su İdman Sarayı və Su Polosu arenalarında
atletlərə idman yarışları və onların nəticələri barədə
olan və digər məlumatları çatdırmaq idi. İşimiz əsasən
idmançılara və onların məşqçi heyətlərinə xidmət
göstərmək idi. Onlar da ən çox Azərbaycanın mədəniyyəti
ilə maraqlanırdı. İctimai nəqliyyatda yaşlılara,
xanımlara yer verilməsi onların çox xoşuna gəlirdi.
Azərbaycanın milli yeməklərini də çox bəyənirdilər.
Oyunlar mənə yerli və xarici dostlar qazandırdı. Ən
əsası öz ölkəmi təmsil etməkdən məmnunam. Bütün
idmançılar və turistlər bizdən razı qaldılar, tezliklə
görüşmək ümidi ilə ayrıldılar.
Mənim üçün könüllülüyün ən xoş tərəfi həm işləməyimiz,
həm də maraqlı günlər keçirməyimiz oldu.
Könüllü olduğum üçün heç vaxt peşman olmayacağam və
gələcəkdə də belə mötəbər yarışlar olsa hər zaman orada
iştirak etməyə hazıram.
 Ağabala
Əliyev,
Azərbaycan Dövlət Neft Akademiyasının qaz-neft mədən
fakültəsinin II kurs tələbəsi
- İşim Bakı İdman Zalında qonaqları qarşılamaq və
yoxlanış yerinə yönəltmək idi. Xarici qonaqları başa
düşəcək və onlara fikrimizi çatdıracaq qədər ingilis
dilini bildiyim üçün rahatlıqla ünsiyyət qura bilirdim.
Onlar Azərbaycanın gözəlliyindən danışırdılar və
gəzməli-görməli yerlərlə maraqlanırdılar. Təbii ki, mən
də böyük həvəslə suallarını cavablandırırdım.
Ən əsası əhatəm genişlənirdi, yeni dostlar qazanır, yeni
insanlar tanıyırdım. Avropa Oyunlarında könüllü olduğum
üçün fərəh hissi keçirirəm. Bağlanış mərasimində
Azərbaycanın adını hər eşidəndə kövrəlirdim. Bu adı
eşitmək insana böyük sevinc hissi yaşadır. Gələcəkdə
belə yarışlar olsa yenə də iştirak edəcəyəm. Çünki
Azərbaycan bu oyunlarla dünyaya nə qazandığını, hansı
gücə, tərəqqiyə malik olduğunu sübut etdi. Və bu oyunlar
gələcəkdəki uğurlarımızın bünövrəsi oldu.
 Ülkər Ələsgərova,
Bakı Slavyan Universitetinin radiotelejurnalistika
ixtisası üzrə magistrantı
- Avropa Oyunları zamanı Atletlər kəndində Rəqəmsal
mərkəzin qrup üzvü kimi fəaliyyət göstərdim. Atletlər
üçün nəzərdə tutulmuş xüsusi sosial platforma olan "ivillage"-nin
kontent təminatını həyata keçirirdik. İşim kənddə
atletlərə "ivillage" barədə məlumat vermək, onların
qeydiyyatdan keçməsinə kömək etmək, atletlərdən sorğular
və müsahibələr götürməkdən ibarət idi. Kənddə baş verən
tədbirlər, konsertlər haqqında videoroliklər hazırlayır,
montaj edir, şəkillər çəkirdim.
Oyunlardan çox şey əldə etdim. Yeni dostlar qazandım,
ingilis dilindən nitqim inkişaf etdi. Ünsiyyətdə olduğum
xarici vətəndaşlar daha çox Azərbaycanın gəzməli yerləri
və milli yeməkləri ilə maraqlanırdı.
İngilis dilində jurnalist kimi fəaliyyət göstərə
bilməyi, müsahibələr almağı öyrəndim. Hər şey əla idi,
gələcəkdə belə yarışlar olanda işçi kimi fəaliyyət
göstərmək istəyirəm.
Mənim üçün ən yaddaqalan hadisə ad günümün iş dövrünə
təsadüf etməsi və könüllü dostlarımın mənə xoş sürprizi
oldu. Bundan başqa İsrail atletindən müsahibə aldım.
|
