|
Zaqatala şəhəri akademik Zərifə Əliyeva adına texniki
fənlər təmayüllü lisey
 Zaqatala
şəhəri akademik Zərifə Əliyeva adına texniki fənlər
təmayüllü lisey 19 sentyabr 2008-ci ildə Prezident İlham
Əliyevin iştirakı ilə açılmışdır. Prezident liseyin
müəllim kollektivi, şagirdlər və valideynlərlə görüşmüş,
onların qarşısında çıxış etmişdir. Ölkə Prezidenti
liseyin fənn kabinetləri və laboratoriyalarını gəzmiş,
kompüter otağı, idman zalı ilə yaxından tanış olmuş və
təhsil ocağı haqqında xoş fikirlər söyləmişdir.
Maddi-texniki bazası
Lisey 1,4 hektar ərazidə yerləşir. İkimərtəbəli tədris
binasının ümumi sahəsi 3524,08 m2-dir.
Şagirdlərin hər bir fənni daha dərindən mənimsəmələri
üçün liseydə hər cür şərait yaradılmışdır. Tədris ocağı
müasir avadanlıq, cihaz və digər texniki vasitələrlə
təchiz olunmuşdur. Burada 8 xüsusi təlim otağı və
laboratoriya, müxtəlif ədəbiyyatlarla zəngin olan
kitabxana, fənn kabinetləri ilə birlikdə 23 sinif otağı
var. Bəzi sinif otaqlarında, idman zalı və dəhlizlərdə
görüntülü kameralar quraşdırılmışdır. Liseydə
şagirdlərin sağlam böyüməsi üçün də hər cür şərait
mövcuddur. Belə ki, liseydə bütün lazımi idman
avadanlıqları ilə təchiz olunmuş idman zalı, voleybol və
basketbol meydançaları şagirdlərin ixtiyarına
verilmişdir.
Təhsil müəssisəsi İKT avadanlıqları ilə də yüksək
səviyyədə təchiz edilmişdir. Liseyə sürətli internet
xətti çəkilmiş, bir çox sinif otaqları, kompüter zalı,
direktor və müavinlərin otaqları, qəbul otağı internet
xəttinə qoşulmuşdur. Hazırda liseyin rəsmi internet
səhifəsi "www.lisey.az" fəaliyyət göstərir. Təhsil
ocağı ilə bağlı bütün məlumatlar, keçirilən tədbirlər
haqqında xəbərlər bu səhifədə yerləşdirilir. Bundan
başqa, liseydə 16 ədəd kompüter, 2 ədəd proyektor, 3
ədəd printer, 1 ədəd surətçıxaran aparat var.
 Liseyin
çox zəngin kitabxanası mövcuddur. Kitabxanada 16709
nüsxə kitab var ki, bunlardan da 14411-i dərslikdir.
Bununla bərabər, kitabxanada qiraət zalı da fəaliyyət
göstərir.
Liseydə görkəmli oftalmoloq alim Zərifə xanım
Əliyevanın həyat və fəaliyyətini əks etdirən
fotoşəkillərdən və kitablardan ibarət guşə yaradılmışdır
ki, bu da şagirdlərin dünyaşöhrətli akademik haqqında
daha geniş məlumat əldə etmələrinə kömək göstərir.
Tədrisin təşkili
Hazırda liseydə 564 şagird təhsil alır. Onların
təlim-tərbiyəsi ilə 52 müəllim məşğuldur. Liseyə Kəmalə
Əhmədova rəhbətlik edir. Təhsil müəssisəsi birnövbəlidir
və təlim dili Azərbaycan dilidir. "Təhsil haqqında"
Azərbaycan Respublikasının Qanununa uyğun olaraq,
liseydə ümumi təhsil üç pillədən ibarətdir: ibtidai
təhsil pilləsi - I-IV siniflər, ümumi orta təhsil
pilləsi - V-IX siniflər, tam orta təhsil pilləsi - X-XI
siniflər. VII ab, VIII ab, IX ab, X a, XI ab sinilfəri
isə lisey siniflərdir. Təhsil müəssisəsinin I sinfinə
şagird qəbulu müsahibə (şifahi sorğu) yolu ilə, II-X
siniflərə isə müsabiqə (yazılı testlə) əsasında
aparılır. Bu məqsədlə "Şagird qəbulu üzrə müsabiqə
komissiyası" yaradılır və bir tədris ili müddətində
fəaliyyət göstərir. Müsabiqə Təhsil Nazirliyinin müəyyən
etdiyi müddətdə keçirilir. Ümumi təhsilin hər üç
pilləsində şagird şəxsiyyətinin formalaşdırılması
"Azərbaycan Respublikasının ümumtəhsil məktəblərinin
Nümunəvi Əsasnaməsi"nə uyğun aparılır. Liseyin I-VI
siniflərində tədris prosesi ümumi əsaslarla, VII-XI
siniflərdə isə təmayüllər üzrə aparılır. Təlimin
keyfiyyətinin yüksəldilməsi məqsədi ilə liseydə müntəzəm
olaraq "dəyirmi masa"lar, seminarlar, müsabiqələr, "açıq
dərs"lər, bilik yarışları keçirilir.
Nailiyyətləri
 Fəaliyyətə
başladığı dövrdən az müddət keçməsinə baxmayaraq lisey
bir çox uğurlara imza atıb. Liseyin ən böyük
uğurlarından biri 2013-cü ildə keçirilən "Ən yaxşı
ümumtəhsil məktəbi" müsabiqəsinin qalibi olmasıdır.
Bundan başqa, liseyin məzunları TDQK-nın keçirdiyi ali
məktəblərə qəbul imtahanlarında yüksək nəticələr
göstərir. Son 5 ilin statistik rəqəmlərinə nəzər
saldıqda görərik ki, 2010-cu ildə təhsil ocağını 19
nəfər bitirmiş, onlardan 8 nəfəri respublikamızın ali
məktəblərinə, 3 nəfəri xarici ölkə təhsil
müəssisələrinə, 2 nəfəri orta ixtisas təhsili
müəssisələrinə daxil olmuşdur. Bundan başqa, 2011-ci
ildə məzun olmuş 30 nəfərdən 14 nəfəri ali təhsil, 6
nəfər orta ixtisas təhsili müəssisələrinə, 2012-ci ildə
məzun olmuş 29 nəfərdən 17 nəfəri , 2013-cü ildə məzun
olmuş 17 nəfərdən 12 nəfəri ali təhsil
müəssisələrinə, 1 nəfər xarici ölkə təhsil
müəssisələrinə, 2014- cü ildə məzun olmuş 15
nəfərdən 8 nəfəri; 2015-ci ildə isə məzun olmuş 16
nəfərdən 12 nəfəri respublikamızın ali məktəblərinə
daxil olmuşdur. 2015-ci ilin məzunlarından 3 nəfəri
600-dən çox bal toplamışdır. Qeyd edək ki, Tələbə Qəbulu
üzrə Dövlət Komissiyasının ali və orta ixtisas
məktəblərinə tələbə qəbulunun nəticələri ilə bağlı
apardığı elmi statistik təhlildə liseyin məzunlarının
nəticələri yüksək qiymətləndirilmişdir.
Liseyin şagirdləri respublikamızda keçirilən bir çox
müsabiqə və yarışlarda uğurla iştirak etmişdir.
Şagirdlərdən Afaq Ramazanova 2012-ci ildə keçirilən "Ən
çox sevdiyim idman növü" müsabiqəsinin qalibi, X sinif
şagirdi Ayşə Qurbanova Təhsil Nazirliyi və Milli
Bankın birgə layihəsi olan "Bu günün qənaəti sabahın
təminatıdır" adlı respublika müsabiqəsində I yerə
çıxaraq fəxri fərmana və xüsusi mükafata layiq
görülmüşdür. Bundan başqa, may ayında "Bakı-2015" I
Avropa Oyunları ilə əlaqədar keçirilən zona üzrə
intellektual bilik yarışmasında liseyin şagirdləri Şahin
Qurbanlı və Əsmər Əmirova rayonun seçmə komandasının
tərkibində liseyi təmsil edərək respublika üzrə I yerə
layiq görülmüş və medalla təltif olunmuşlar. "Bakı-2015"
I Avropa Oyunları ilə əlaqədar rayonda keçirilən "Alov
festivalında" XI sinif şagirdi Elşən Ramazanov fəal
gənc kimi liseyi təmsil etmişdir.
 Bu
ilin məzunu Aytac Xodayevanın yüksək balla (685 bal)
qəbul olduğu Bakı Ali Neft Məktəbinin rektoru adından
liseyin direktoru və pedaqoji kollektivinə xüsusi
təşəkkür məktubu göndərilmişdir. Bu da liseyin
gələcəkdə daha böyük uğurlar əldə etməsinə böyük stimul
olmuşdur.
Liseyin pedaqoji kollektivi tədris ocağının uğurlarının
təminatçısıdır. Liseyin müəllimləri daim öz üzərlərində
çalışaraq müasir texnologiyalardan və təlim üsullarından
bacarıqla istifadə edirlər. Bütün bunların nəticəsidir
ki, liseyin tarix müəllimi Könül Əliyeva 2014-cü ildə
Təhsil Nazirliyinin təşkil etdiyi "Elektron təhsil"
respublika müsabiqəsində iştirak edərək II yerə layiq
görülmüş, eyni zamanda "Promethan aktiv lövhələrin"
tədrisdə tətbiqi müsabiqəsində fərqlənmişdir.
İstedad bankı
"İstedadlara qayğı bizim borcumuzdur" deyən ulu öndər
Heydər Əliyev siyasi kursunun layiqli davamçısı
möhtərəm Prezidentimiz İlham Əliyev 17 aprel 2006-cı
ildə "Xüsusi istedada malik olan uşaqların
(gənclərin) yaradıcılıq potensialının inkişafı üzrə
Dövlət Proqramı"nın təsdiq edilməsi haqqında verdiyi
sərəncamından irəli gələn vəzifələrin yerinə yetirilməsi
istiqamətində liseydə mühüm işlər görülür. İstedad
bütövlüklə dövlətin, cəmiyyətin qazancı, uğuru, onun
inkişaf etmiş ölkələr arasında tanınması, seçilməsi
deməkdir. İstedadın inkişafı üçün ilkin amil kimi təbii
imkanlar ancaq məqsədyönlü şəkildə aparılan
təlim-tərbiyə prosesində inkişaf edir. Bu məqsədlə də
liseydə "İstedad bankı" yaradılmışdır. "İstedad
bankı"nın əsas məqsədi istedadlı uşaqların üzə
çıxarılması və onlarla xüsusi işin aparılmasıdır. "İstedad
bankı"nın təşkili üçün müxtəlif fənlər üzrə
metodbirləşmə iclasları keçirilir, xüsusi komissiya
yaradılır. İB -na liseyin tədris işləri üzrə direktor
müavini Vüsalə Mahmudova rəhbərlik edir. Fənn
metodbirləşmə rəhbərləri İB-nın münsiflər heyətinin
üzvləridirlər. İB-nın üzvləri liseyin psixoloqu və uşaq
birliyi rəhbəri tərəfindən seçilir. Fənn birləşmə
rəhbərləri tərəfindən suallar tərtib olunur,
müsabiqələr keçirilir. Bununla yanaşı, istedadlı
şagirdlərin üzə çıxarılması üçün zəruri olan diaqnostik
metodlardan da istifadə olunur. İB-na seçilmiş
şagirdlərin öz üzərində çalışmaları üçün fənn
müəllimləri təhkim olunur. İB-nın fəal üzvləri fənn
olimpiadalarında və müxtəlif bilik yarışlarında liseyi
yüksək səviyyədə təmsil edirlər.
 Dostluq
körpüsü
Liseyin müəllim və şagird kollektivi daim əlamətdar
günlərlə bağlı müxtəlif tədbirlər keçirir. Belə ki,
görkəmli oftalmoloq alim Zərifə xanım Əliyevanın doğum
günü hər il liseydə yüksək səviyyədə qeyd olunur.
2015-ci il aprelin 27-də lisey akademik Zərifə
Əliyevanın anadan olmasının 92-ci ildönümünü ötən
illərdən fərqli olaraq qeyd etmişdir. Belə ki, Bakı
şəhəri akademik Zərifə Əliyeva adına liseylə birgə
"Zülmətləri yaran işıq" adlı geniş tədbir təşkil
olunmuşdur. Birgə keçirilən tədbir nəticəsində həmçinin
hər iki lisey arasında "Dostluq körpüsü"
yaradılmışdır.
Liseyi 2015-ci ildə bitirən və qəbul imtahanlarında
600-dən çox bal toplayan məzunların tədris ocağı
haqqında təəssüratları
Aytac Xodayeva,
Bakı Ali Neft Məktəbinin I kurs tələbəsi
 Mən
685 balla rayon ikincisi olduğumu eşidən kimi məzunu
olduğum akademik Zərifə Əliyeva adına liseyin direktoru
Kəmalə Əhmədovaya zəng vurdum. Çünki bu tək mənim yox,
doğma məktəbimin uğuru idi. Müəllimlərim məni
inandırmışdı ki, sən hökmən 700 bal toplamalısan. 700
balı toplaya bilməsəm də 685 balla rayon ikincisi oldum.
Daha sonra sinif yoldaşlarımın da 2 nəfəri 600 balı
keçərək liseyimizin adını rayon səviyyəsində öncül
sıralara yüksəltdi. Bu bizim daim sinifdə birgə
oxumağımızın, dərslərdə, elmi müzakirələrdə istədiyimiz
sualın cavabını birgə axtardığımızın nəticəsi idi.
Liseyimizin bütün müəllim və rəhbər heyətinə
minnətdarlığımı bildirirəm.
Elşən Ramazanov,
Polis Akademiyasının I kurs tələbəsi
Mən 623 balla Polis Akademiyasına qəbul olmuşam. Bu
liseyi bitirsəm də bütün dərsləri, tədbirləri ömrüm boyu
unutmayacağam. Çünki biz elmi biliklərə yiyələnməyi,
fəal ictimaiyyətçi və əsl vətənpərvər vətəndaş olmağı
burada öyrəndik. Bu il mənim üçün daha bir hadisə ilə
yadda qaldı. Belə ki, "Bakı-2015" I Avropa Oyunlarına
hazırlıq məqsədi ilə rayonda keçirilən məşəl tədbirində
alov tutmaq kimi məsuliyyətli və şərəfli iş mənə həvalə
olundu. Bu uğurum üçün Zaqatala şəhəri akademik Zərifə
Əliyeva adına texniki fənlər təmayüllü liseyin
rəhbərliyinə, onun bütün müəllim heyətinə sonsuz
minnətdaram.
Nərgiz Heydərova,
Azərbaycan Tibb Universitetinin I kurs tələbəsi
615 balla ATU-ya qəbul olmuşam. Bu uğura görə bütün
müəllimlərimə və sinif yoldaşlarıma minnətdaram. Çünki
biz birgə çalışdıq, birgə öyrəndik. Bu şəraiti bizə
doğma liseyimiz, adını fəxrlə daşıdığımız Zaqatala
şəhəri akademik Zərifə Əliyeva adına texniki fənlər
təmayüllü liseyin müəllimləri yaratmışdır. Mən də
çalışacağam ki, Zərifə xanımın adına layiq gözəl bir
həkim kimi xalqıma xidmət edim.
Niyazi RƏHİMOV,
"Azərbaycan müəllimi"
[email protected] |
