|
Azərbaycan Tibb Universitetinin tələbəsi Asya Mahmudova
ilə söhbət
Asya Mahmudova 1996-cı ildə Zaqatala rayonunun
Əliabad qəsəbəsində anadan olub. 2015-ci ildə Əliabad
qəsəbə 1 nömrəli tam orta məktəbi əla qiymətlərlə
bitirib. Orta məktəb illərində tədris ocağının ictimai
işlərində fəal iştirak edib, “İlin şagirdi” adını
qazanıb. Məktəbi bitirən il fəxri fərmana layiq
görülüb. Tələbə Qəbulu üzrə Dövlət Komissiyasının
(TQDK-nın) 2015-2016-cı tədris ili üçün ali təhsil
müəssisələrinə keçirdiyi qəbul imtahanında ən yüksək
nəticə - 700 bal toplayaraq Azərbaycan Tibb
Universitetinin müalicə işi fakültəsinə qəbul olub.
Ölkə rəhbərinin müvafiq sərəncamı ilə Prezident
təqaüdünə layiq görülüb.
Tələbəlik illərini yada salarkən hansı yaşda
olursa-olsun qəribə psixoloji anlar yaşamalı,
kövrəlməli, qürur hissi keçirməli olursan. Hahaq yerə
həmin illərə mahnılar, az qala dastanlar bəstələnməyib
ki! Bu gündən həmin illərə bağlananda onun ən acı
günləri də bal dadır, insan o şirin xəyallardan bir
an belə ayrılmaq istəmir. Yataqxana həyatı isə
tələbəlik illərini bol-bol xatirələrlə daha
yaddaqalan edir. Bu günlərdə Azərbaycan Tibb
Universitetinin 3 nömrəli qızlar yataqxanasına
yollandım. Məqsədim qəbul imtahanlarından 700 bal
toplayan tələbə Asya Mahmudovadan yazı hazırlamaq,
yenicə qədəm qoyduğu tələbə həyatı, yataqxana mühiti
ilə bağlı təəssüratlarını dinləmək idi. İkinci
mərtəbəyə qalxıb ehmalca 5-ci otağı döydüm. Qapını
ağbəniz bir qız açdı: - xoş gəlmisiniz,- söyləyib məni
içəri dəvət etdi. Onun otaq yoldaşları da mehriban
və səmimi qızlar idilər. Amella Hüseynova 657, Nuranə
Nərimanlı isə 639 balla Azərbaycan Tibb
Universitetinin müalicə işi fakültəsinə daxil olublar.
Bir göz qırpımında çay süfrəsi hazırladılar və
“qəhrəmanımızla” söhbətə başladıq.
- Bəzən düşünürlər ki, ali məktəblərə qəbul
imtahanlarından yüksək nəticə göstərən abituriyentlər
ancaq qabaqcıl təhsil müəssisələrinin yetirmələri ola
bilər? Sən necə düşünürsən, bu fikirlə razılaşmaq
olarmı?
- Xeyr. Əsas müəllimlərinin savadlı olmasıdır.
Abituriyentlər üçün məktəb hazırlığının, aşağı
siniflərdə öyrənilənlərin rolu əvəzsizdir. Məktəbin
yaraşıqlı, yeni standartlara cavab verməsi,
bəzək-düzəyi əsas deyil. Əsas nizam-intizam, dərsə
davamiyyət, müəllimin verdiyi tapşırıqları yerinə
yetirmək, yaxşı oxumaqdır.
- Ən çox sevdiyin fənn?
- Bütün fənlər mənim üçün maraqlı olub. Təxminən 7-8-ci
siniflərdə oxuyanda həkim olmağı arzulayırdım.
Hazırlaşdığım müddətdə isə daha çox IV qrupdakı
fənlərə maraq göstərdim. Ən çox sevdiyim fənn
Azərbaycan dilidir. Texniki fənlər çətin deyil. Əslində
istər texniki, istərsə də humanitar fənlərin müəyyən
çətinlikləri var. Ancaq əzmkarlıq göstərib özünü yaxşı
hazırlamaq lazımdır.
- Hansı kurslarda iştirak etmisən?
- Ali məktəbə Zaqatala Modern Hazırlıq Mərkəzində
hazırlaşmışam. Hər ay mərkəzdə sınaqlar keçirilirdi.
9-cu sinifdə oxuyarkən sınaqdan 676 bal topladım. X-XI
siniflərdə isə 690-700 bal toplayırdım. Yalnız zəhmət
çəkməklə arzuları reallaşdırmaq olar. Çünki mən
nəticəsini gözəl gördüm.
- Qəbul imtahanının gedişindən razı qaldınmı?
- Şübhəsiz. Yaxşı hazırlıqlı olursansa imtahanın necə
keçdiyinin sənin üçün əhəmiyyəti olmur. Düşündürücü
suallar var idi, ancaq çox da ağır deyildi. Mənim elə
bir çətinliyim olmadı. I-XI sinifləri əla qiymətlərlə
başa vurmuşdum. İmtahanın gedişatından çox razı qaldım.
Səbrlə, təmkinlə sualları cavablandırdım.
- 700 bal toplayacağına əmin idinmi?
- Sınaq imtahanlarında da 700 bal toplamışdım.
Əvvəlcədən əmin olmasam da böyük ümidlə 700 balı
gözləyirdim. Sınaq imtahanları abituriyentin qəbula
hazırlığını daha da asanlaşdırır. Eyni zamanda imtahan
təcrübəsi toplamaqda və qəbul imtahanına psixoloji
cəhətdən hazırlıqda sınaq imtahanlarının rolu
əvəzsizdir. Abituriyentlər üçün məktəb hazırlığının,
aşağı siniflərdə öyrənilənlərin rolu danılmazdır.
Valideynlərim də məndən yüksək nəticə gözləyirdilər.
700 bal toplamağımı eşidəndə hər kəs - müəllimlərim,
qohumlarım çox sevinirdilər. Xüsusilə də sinif
rəhbərim Fatma Hacıəhmədovanın sevincinin hədd-hüdudu
yox idi. Çəkdiyi zəhmətin bəhrəsi göz önündə idi. Ona
çox minnətdaram.
- Gələcək abituriyentlərə nə məsləhət görərdin?
- İlk növbədə, hər kəs hədəfini düzgün
müəyyənləşdirməlidir. Əgər məqsəd oxumaq, yüksək nəticə
ilə ali məktəbə qəbul olunmaqdırsa, onda hər kəs öz
üzərində ciddi hazırlaşmalıdır. İlk baxışda dərslər
çox çətin gələ bilər. Amma səylə çalışmaq lazımdır ki,
çətinlikləri aradan qaldırasan.
- Mütaliə ilə məşğul olursanmı?
- Bir an belə mütaliəsiz qalmaq olmaz. İnsanın
dünyagörüşünün formalaşmasında mütaliə mühüm rol
oynayır. Azərbaycan və dünya ədəbiyyatı klassiklərinin
əsərlərini oxuyuram. Viktor Hüqonun “Səfillər” romanını
oxumuşam və s. Humanitar elmlərə marağım dəqiq
elmlərdən az deyil.
- Orta məktəb illərində inşa yazı müsabiqəsi keçirilir.
“Böyüyəndə hansı peşəni seçəcəksən?” Sən öz arzularını
necə ifadə edirdin?
- İki seçim arasında qalmışdım. Müəllim yaxud həkim.
İlk dəfə ibtidai sinif müəllimi Məlahət Muradovanı
görəndə sinif müəllimi olmaq istəyirdim. Amma sonra
həkimlik peşəsini seçdim. Mən peşəsinin əsl sahibi olan
bir həkim olmaq istəyirəm. İnşa yazımda da beləcə
yazmışdım və “beş” aldım. Həkimlik çox ağır və
məsuliyyətli peşədir.
- Xarici dil necə, bilirsənmi?
- Hazırda ərəb və ingilis dili ilə müstəqil məşğul
oluram. Bunun üçün əlavə hazırlığa getmirəm. Sadəcə
xarici dilləri mükəmməl öyrənməyi özümə borc bilirəm.
Biz ömrümüzün ən gözəl çağı olan gəncliyimizi bununla
daha dəyərli və məzmunlu edə bilərik. Allah hər
birimizə faydalı elm nəsib etsin.
- Yataqxana həyatı cansıxıcı deyil ki?
- İlk günlər lap çox darıxırdım; atam və anam,
bacı-qardaşlarım üçün. Həftələr bir-birini əvəz edir,
vaxtımın çox hissəsı kitabxanalarda keçir. Amma proqram,
tapşırıq da çoxdur. Çalışacağam ki, öhdəsindən gəlim.
Semestr imtahanlarından əla qiymətlər alım. Yeri
gəlmişkən, qeyd etməyi özümə borc bilirəm ki, Bilik
gününə həsr edilmiş tədbirdə rektor Əhliman
Əmiraslanov məni ən yüksək nəticə ilə Azərbaycan Tibb
Universitetinə qəbul olmağım münasibətilə təbrik və
mənə təhsildə yeni-yeni uğurlar diləyərək “Onkologiya”
kitabını hədiyyə etdi. Rektorumuzun çıxışı məni
gələcəkdə daha da yaxşı oxumağa, peşəkar mütəxəssis
olmağa ruhlandırdı. O ki qaldı yataqxana həyatına,
zərrəcə sıxılmıram. Gözəl otaq yoldaşlarım var. Onlar
mənim ən yaxın rəfiqələrimdir.
- Müəllimlərinlə əlaqə saxlayırsanmı?
- 5 oktyabr - Beynəlxalq Müəllimlər Günündə bütün
müəllimlərimi təbrik etdim, onlara xoş arzularımı
bildirdim.
Bəli, həkim olmağı qarşısına məqsəd qoyan Asya bu
sahədə peşəkar mütəxəssis olmaqla insanların
sağlamlığının keşiyində duracağına əmindir. Bunun üçün
isə ondan çətin, eyni zamanda şərəfli tələbəlik həyatını
müvəffəqiyyətlə başa vurmaq tələb olunur. Elə bu
arzularla da tələbəlik həyatına yenicə qədəm qoymuş
həmsöhbətimlə və onun dilli-dilavər rəfiqələri ilə
xudahafizləşib ayrıldım. Çayları çox dadlı idi.
Tələbəlik illərində yataqxana həyatında dəmlədiyim
ətirli çayın dadını verirdi...
Sifai SƏFƏROVA,
“Azərbaycan müəllimi”
[email protected] |
