Bakı Mühəndislik Universitetinin (BMU) iqtisadiyyat və idarəetmə fakültəsində Mühasibatlıq uçotu və audit ixtisasında (İstehsal sferasında mühasibat uçotu və audit ixtisaslaşması)  təhsil alan magistrantların dissertasiya işlərinin onlayn müdafiəsi keçirilib.

Universitetdən verilən məlumata görə, müdafiə prosesinə qoşulan BMU-nun rektoru, professor Havar Məmmədov pandemiya dövründə dərslərin məsafədən tədrisi istiqamətində təhsilin magistratura səviyyəsində həyata keçirilən işlərdən söz açıb. O, mövcud şəraitdə tələbələrin dissertasiya işlərini yüksək səviyyədə hazırladıqlarını bildirib və bunu yüksək qiymətləndirib. Təqdimatları dinləyən rektor ən yüksək nəticə göstərən tələbələrin BMU-da akademik karyeralarını davam etdirə biləcəklərini vurğulayıb və onlara nailiyyətlər arzulayıb.

İxtisaslaşdırılmış Elmi Şuranın sədri dosent Ənvər Salahovun rəhbərliyi ilə keçirilən müdafiə prosesində magistrantlar öz dissertasiya işlərini yüksək səviyyədə təqdim ediblər.

Dissertasiya işləri təqdim edildikdən sonra müzakirələr aparılıb, şura üzvləri çıxış edərək öz sual, təklif və tövsiyələrini səsləndiriblər. Dissertasiya işlərinin müzakirəsindən sonra səsvermə yolu ilə təqdim olunan işlər müsbət qiymətləndirilib. 2 magistrantın təqdimatı isə ən yüksək balla - 100 balla dəyərləndirilib.

Məlumat üçün bildirilib ki, 22 iyun tarixində başlayan dissertasiya işlərinin müdafiəsi 25 iyuna kimi davam edəcək. Belə ki, Biznesin təşkili və idarə edilməsi, İstehsalat və xidmət sahələrinin iqtisadiyyatı və idarə edilməsi (sənaye üzrə), Maliyyə menecmenti və Dövlət strukturlarında menecment ixtisaslaşmalarında dissertasiya işlərinin müdafiəsi iyunun 24-də, Beynəlxalq iqtisadi münasibətlər ixtisaslaşmasında isə iyunun 25-də təşkil olunacaq.