Azərbaycan Milli Elmlər Akademiyası (AMEA) Coğrafiya İnstitutunun elmi  işlər üzrə direktor müavini, dosent Məhərrəm Həsənov Azərbaycan televiziyasında yayımlanan "Telesəhər"  musiqi-informasiya proqramının qonağı olub. 

Coğrafiya sahəsinin alimi verilişdə  son günlər Kür çayında suyun səviyyəsinin aşağı enməsi məsələsinə aydınlıq gətirib. O, çayda suyun azalmasının səbəblərini açıqlayarkən bildirib ki, Azərbaycanın su ehtiyatının 70 faizi  qonşu ölkələrdə formalaşıb ölkəyə gələn suyun səviyyəsindən asılıdır. 2014-cü ildən başlayaraq, son 6 il ərzində Azərbaycana daxil olan Kür suyunun həcmi 25 faiz azalıb, yəni ölkəyə  suyun cəmi 4-də biri çatır. Bir neçə gün qabaq akademik Ramiz Məmmədovla Kür ətrafı ərazilərdə çayı tədqiq edərkən Neftçala, Salyan rayonlarında 60 km. ərazidə  Xəzərin Kürə qarışdığını müşahidə etdiklərini deyən mütəxəssis sakinlərin şirin  su qıtlığından əziyyət çəkdiklərini qeyd edib.

Alim yaranmış vəziyyəti düzəltmək üçün  təcili olaraq Kürün deltasını Xəzər dənizinə qovuşan yerdə asılı materiallardan və gildən təmizləməyin vacib olduğunu vurğulayıb. Əks təqdirdə, Kürün suyu artarsa, bu, daşqınlara səbəb ola bilər. M.Həsənov bildirib ki, qlobal istiləşmə ilə əlaqədar buxarlanmanın  artması, buzlaqların, eləcə də yağıntıların azalması da Kürdə suyun səviyyəsini aşağı salan səbəblərindəndir.

Alim, həmçinin istifadə olunmuş suyun təmizləndikdən sonra dənizə axıdılmasını israfçılıq hesab edərək onun təkrar emalını məqsədəuyğun hesab edib və hamını suyun istifadəsində qənaətcil olmağa səsləyib.