Azərbaycan Tibb Universitetinin (ATU) Böyük Elmi Şurasının iclası keçirilib və rezidentura mərhələsində həkim-mütəxəssislərin hazırlanmasının vəziyyəti müzakirə edilib.
Rezidentura və magistratura şöbəsinin müdiri, professor Nailə Sultanova bildirib ki, hazırda universitetdə 57 ixtisas üzrə I kursda - 194 , II kursda - 180, III kursda - 138, IV kursda - 68, V kursda - 29 olmaqla, 609 nəfər rezident təhsil alır ki, onlardan da 49 nəfəri əcnəbi vətəndaşlardır; 3 nəfər isə ödənişli əsaslarla 2 - ci təhsil alan rezidentlərdir; 16 müxtəlif bazalara müqavilə yolu ilə 175 rezident təhkim olunub.
Şöbə müdiri deyib ki, Azərbaycanda rezidentura yolu ilə həkim-mütəxəssis hazırlığında təhsil müddəti 2 ildən 5 ilədək olmaqla, 57 ixtisas üzrə aparılır. 2020 –ci ildə isə rezidentura hazırlığına 18 ixtisas əlavə edilib. Ali təhsilin magistratura səviyyəsi üzrə təhsil pilləsinə 2020 -ci ildən etibarən 2 yeni ixtisas- Səhiyyə menecmeni və Klinik psixologiya ixtisasları əlavə olunmaqla, 7 ixtisas üzrə qəbul aparılıb. Magistraturanın I kursunda -35, II kursunda -13 nəfər olmaqla 48 magistrant təhsil alır.
N.Sultanovanın sözlərinə görə, rezidentlərin kliniki hazırlığını yaxşılaşdırmaq və müasir tələblər səviyyəsinə çatdırmaq üçün klinikalarda və laboratoriyalarda rezidentlər üçün lazımı şərait yaratmaq, onların xəstələrin müayinəsi, diaqnostikası və müalicəsi prosesində yaxından iştirak etmələri, müasir protokollarla tanış olmaları üçün kuratorlar, kafedra və şöbə müdirləri, eləcə də klinika rəhbərləri daimi olaraq diqqət göstərməlidirlər.
Pandemiya ilə əlaqədar xüsusi karantin rejiminə uyğun olaraq rezidentlərin iş rejimində də bəzi dəyişikliklərin olduğunu söyləyən N.Sultanova deyib ki, COVID -19-la mübarizə planında ATU-ya təhkim olunmuş, ixtisasından və kursundan asılı olmayaraq bütün rezidentlərin həm ambulator, həm də stasionar istiqamətdə çox aktiv iş planı ilə işləməsi, bu mübarizədə fəal iştirak etməsi onların həkimlik praktikasında da çox böyük təcrübi biliklərin əldə edilməsinə səbəb olub. Bununla yanaşı, İkinci Qarabağ müharibəsi zamanı qazılərə göstərilən tibbi xidmətlərdə də rezidentlərin zəhməti danılmazdır.
Onun sözlərinə görə, rezidentlərin mükəmməl təkmilləşmələri və klinik bacarıqlarını daha da artırmaq məqsədi ilə 2013-cü ildən başlayaraq, ATU ilə xarici ölkə üniversitetləri arasında bağlanmış ikitərəfli müqavilələr əsasında rezidentlərin xaricdə rotasiyaları təşkil olunur. 2019- cu ildən indiyədək ABŞ- da 2, Türkiyədə - 145, Almaniyada - 30, İtaliyada-1, İngiltərədə-1, Avstriyada -1 nəfər olmaqla rezidentlər rotasiyaya göndərilib və bu iş hazırda da uğurla davam etdirilir.
Rezidentura təhsilində dövrü və yekun attestasiya imtahanlarından da bəhs edən şöbə müdiri söyləyib ki, imtahanlar rezidentura təhsilinin məzmunu və təşkili qaydalarına uyğun aparılıb:“Yekun attestasiyada Səhiyyə Nazirliyinin əməkdaşları həm test mərhələsində, həm də ΙΙ mərhələ sayılan klinik bacarıq imtahanlarının təşkili və keçirilməsində iştirak ediblər. Yekun imtahanda iştirakı nəzərdə tutulan 344 rezidentdən 14 nəfəri imtahana gəlməyib, 330 rezidentdən 33 nəfər kəsilib, 297 nəfər isə ΙΙ mərhələyə buraxılıb. ΙΙ- ci mərhələdə 297 nəfər iştirak edib və 296 nəfər imtahandan kecib, 1 nəfər isə kəsilib”.
Universitetin rektoru, professor Gəray Gəraybəyli müzakirə olunan məsələlərə münasibət bildirib:”Rezidentura təhsili tibb təhsilinin vacib tərkib hissəsi olmaqla yanaşı, yenə də təkmilləşməlidir. Rezidenturada bu və digər ixtisaslar üzrə proqramlar yenilənməlidir. Bu proses pandemiyadan əvvəlki dövrdə başlayıb . Bir neçə ixtisaslar üzrə proqramlar hazırlanıb və beynəlxalq ekspertlər tərəfindən təsdiqlənib. Qalan ixtisasalar üzrə də proqramların təkmilləşdirilməsi vacibdir. O proqramlarda rezidentlərin, ilk növbədə praktik vərdişlərə yönəldilməsini və onların elmi fəaliyyətə istiqamətləndirilməsini vacib hesab edirəm. Bazalar haqqında danışdıqda, ilk növbədə rezidentlərin təhsili nəzərdə tutulur. Amma 3 ildir ki, istər dövlət, istərsə də özəl klinikalarla müqavilə bağlayıb onlardan da baza kimi istifadə edirik. Məmnunam ki, bu günkü epidemioloji vəziyyətə baxmayaraq, qaydalara riayət etmək şərti ilə rezidentlərin imtahanlarını apara bildik. Hesab edirəm ki, şöbənin fəaliyyəti yetərincədir və ümumilikdə rezidentura təhsili irəli gedir”.