Mingəçevir Dövlət Universitetinin (MDU) rektoru Şahin Bayramov Azərbaycan Təhsil İşçiləri Azad Həmkarlar İttifaqı Respublika Komitəsinin (ATİAHİ) adlı təqaüdünə layiq görülən universitetin mühəndislik fakültəsinin ikinci kurs tələbəsi Pərvin Əhmədovla görüşüb.

Adlı təqaüdün hər semestr imtahan sessiyasının nəticələrinə və həmkarlar ittifaqında fəallığına görə ali təhsil müəssisəsinin tələbələrinə verildiyini qeyd edən rektor P.Əhmədovun əldə etdiyi nailiyyəti yüksək qiymətləndirib.

Respublika üzrə ATİAHİ-nin adlı təqaüdünün təqdim edildiyi 65 universitet tələbəsindən biri olmağı mühüm uğur kimi dəyərləndirən Ş.Bayramov bu münasibətlə P.Əhmədovu təbrik edib və ona tələbə həyatında yeni-yeni uğurlar arzulayıb.

Universitet adına qazanılan uğurdan məmnunluğunu ifadə edən P.Əhmədov pandemiya dövrünün çətinliklərinə baxmayaraq, tələbə gənclərə göstərilən davamlı dəstəyə görə təşəkkürünü bildirib.

Qeyd edək ki, tələbələrin elmə və təhsilə marağının artırılması məqsədilə ATİAHİ tərəfindən təsis olunan adlı təqaüdə layiq görülən P.Əhmədov 2020/2021-ci tədris ili üzrə payız semestrinin imtahan sessiyasında bütün fənlər üzrə 100 bal toplayaraq ən yüksək nəticəni əldə edib. O, həmçinin MDU-nun Tələbə Gənclər Təşkilatı, Tələbə Elmi Cəmiyyəti və Həmkarlar Təşkilatının işində fəal iştirak edir.