Lənkəran Dövlət Universitetində ( LDU) Elmi Şuranın onlayn formatda növbəti iclası keçirilib.
Universitetdən bildirilib ki, LDU-nun rektoru vəzifəsini icra edən professor Natiq İbrahimov koronavirus (COVID-19) pandemiyasının yayılmasının qarşısının alınması istiqamətində ölkədə və təhsil ocağında görülən qabaqlayıcı tədbirlər, xüsusi karantin rejimində tələbə və magistrantların təhsilinin davamlılığının təmin olunması istiqamətində aparılan işlərdən danışıb. Pandemiya dövründə dərslərin məsafədən tədrisi istiqamətində mümkün olan bütün tədbirlərin görüldüyünü deyən N.İbrahimov tələbələrin böyük əksəriyyətinin onlayn dərslərdə fəal iştirakını müsbət hal kimi dəyərləndirib.
Elmi Şura üzvlərinin yekdil rəyi ilə “2019/2020-ci tədris ilinin yaz semestrinin imtahan sessiyasının keçirilməsi qaydaları” ilkin müzakirə edilib. Bu barədə tədrisin təşkili və təlim texnologiyaları üzrə prorektor vəzifəsini icra edən dosent İdrak Əsgərov məlumat verib. Diqqət çəkən əsas məqamsa LDU-da tələbələrin yaz semestrinin imtahan sessiyasında nəzərdə tutulan imtahanların 35%-dən azad edilməsi olub. Mövcud vəziyyətlə bağlı tələbələrə digər güzəştlər də edilib. Hər bir fənn üzrə tərtib olunmuş imtahan suallarının sayı fənnin məzmunu və əhatəliyi gözlənilməklə azaldılıb, həmçinin sadələşdirilib.
Bildirilib ki, bakalavriat səviyyəsində tədris planının bütün şərtlərini yerinə yetirən, o cümlədən nəzərdə tutulan cari attestasiyalardan (fənlər üzrə) müvəffəqiyyətlə keçən tələbələr təhsil müddətində əldə etdikləri nəticələrə (ÜOMG-nə) uyğun olaraq yekun attestasiyadan keçmiş hesab olunacaqlar. Bu qiymətləndirmə ilə razı olmayan tələbələr üçün isə ixtisas üzrə dövlət imtahanının iyun ayının 30-dan iyul ayının 5-dək onlayn qaydada təşkili nəzərdə tutulub.
Tədqiqat işləri və innovasiyalar üzrə prorektor vəzifəsini icra edən dosent Elvin Əliyev bildirib ki, magistratura səviyyəsində magistrlik dissertasiyasının məzmununa və yazılmasına qoyulan ümumi tələblər yerinə yetirilməklə magistrlik dissertasiyası magistrant tərəfindən poçt vasitəsilə müvafiq fakultə dekanlığına təqdim edilməlidir . Məlumat verilib ki, ixtisaslaşdırılmış şuraların iclasları onlayn qaydada təşkil olunmaqla magistrlik dissertasiyasının müdafiəsi 16-25 iyun 2020-ci il tarixləri arasında (cədvəl üzrə) keçiriləcək.
Elmi Şurada universitetdə fəaliyyət göstərən fakültələrin strukturunda dəyişiklik edilməsi ilə bağlı məsələ də müzakirə edilib. Müzakirəyə çıxarılan bütün məsələlər barədə qərar qəbul olunub.