Azərbaycan Dövlət İqtisad Universitetində (UNEC) “Qarabağ iqtisadiyyatının dirçəlişində “Halal” qida industriyası: müasir çağırışlar və real imkanlar” mövzusunda beynəlxalq konfrans keçirilib.
UNEC İslam Maliyyə Mərkəzinin rəhbəri, professor Zahid Məmmədov konfransın məqsədindən, mövzunun aktuallığından danışıb. O, İslam iqtisadiyyatının bu gün ölkəmiz üçün daha aktual olduğunu, Qarabağ regionunda kapitaltutumlu iri meqalayihələrin təminatı üçün alternativ maliyyə qaynaqlarına ehtiyac duyulduğunu qeyd edib. Qarabağda İslam iqtisadiyyatının əsas hərəkətverici qüvvəsinin məhz qida sənayesi olduğunu iştirakçıların diqqətinə çatdırıb.
Milli Məclisin deputatı, akademik Ziyad Səmədzadə mövzunun aktuallığına diqqət çəkərək, ölkə Prezidentinin Qarabağ regionunun gələcəkdə dinamik inkişaf edən məkana çevrilməsi ilə bağlı verdiyi tapşırıqlardan bəhs edib. Azad olunmuş torpaqlarda kənd təsərrüfatı və aqrar sektorun inkişaf etdirilməsi üçün münbit şəraitin olduğunu bildirib.
İstanbul Sabahattin Zaim Universitetinin “Helal qida Ar-Ge ve Mükemmeliyet Merkezi”nin müdiri, professor Hasan Yetim “Dünya ərzaq bazarında “Halal” qida sektoru: qlobal çağırışlar və problemlər” mövzusunda çıxış edərək, dünyada halal qida sektorunun getdikcə daha önəm qazanan sahə olduğunu qeyd edib. Hazırda dünyada 2 trilyon dollara yaxın halal məhsullar bazarının mövcudluğunu, halal qida məhsullarının istehlakında islam ölkələrinin payının aşağı olduğunu bildirib. İstehlak payının artırılması istiqamətində ölkələrimizin, xüsusilə də Qarabağ regionunun böyük potensiala malik olduğunu vurğulayıb.
Kabardin-Balkar Dövlət Aqrar Universitetinin Qida texnologiyası kafedrasının müdiri, professor Amina Djobaeva “İslam iqtisadiyyatında qida məhsullarının istehsalı və istehlakı məsələlərinə elmi baxış” mövzusunda çıxış edib, islam ölkələrində ərzaq məhsullarının istehsalı, eləcə də ticarəti ilə məşğul olan təsərrüfat subyektlərinin üzərinə böyük məsuliyyət düşdüyünü söyləyib. İstehsalçı və ticarətçilər üçün qida məhsullarının təhlükəsizliyinin və istehlakçılara sağlam ərzaq məhsullarının çatdırılmasının ən mühüm öhdəlik olduğunu vurğulayıb.
UNEC Mühəndislik və tətbiqi elmlər kafedrasının professoru Zabit Aslanov “Azərbaycanda halal sertifikatlaşdırma: real vəziyyət və perspektivlər” mövzusunda çıxış edərək koronavirusla mübarizə dövründə artıq insanların halal və təmiz qida axtarışında olduqlarını, bunun təkcə müsəlman ölkələrini deyil, bütün dünyanı narahat edən bir məsələ olduğunu bildirib. Qarabağ regionunun təmiz hava, münbit torpaq, saf su resurslarına malik olmasının ekoloji təmiz ərzaq məhsulları istehsalı sahəsində çox böyük imkanlar yaradacağını vurğulayıb.
Sonda mövzu ətrafında müzakirələr aparılıb.
Konfrans UNEC-in rəsmi Facebook səhifəsi üzərindən canlı yayımlanıb.