Bakı Dövlət Universitetinin (BDU) rektoru Elçin Babayev Böyük Britaniyanın nüfuzlu universitetlərindən biri olan Qlazqo Universitetinin Qlobal əməkdaşlıq üzrə dekanı professor Moyra Bolandla görüşüb.

Rektor E.Babayev BDU-nun tarixi, elmi fəaliyyəti və beynəlxalq əlaqələri haqqında  qonağa ətraflı məlumat verib. Universitetdə 16 fakültənin fəaliyyət göstərdiyini qeyd edən E.Babayev BDU-da ali təhsilin bütün səviyyələrində 25000-ə yaxın tələbənin təhsil aldığını bildirib. Rektor BDU-nun beynəlxalq əlaqələrində Avropa dövlətləri, o cümlədən Böyük Britaniya universitetləri ilə əməkdaşlığa xüsusilə önəm verdiyini vurğulayıb.

Qlazqo Universitetinin Qlobal əməkdaşlıq üzrə dekanı professor Moyra Boland qəbula görə təşəkkürünü bildirib. M.Boland Qlazqo Universitetinin fəaliyyəti, o cümlədən beynəlxalq əlaqələri haqqında məlumat verib, ikitərəfli əməkdaşlığın perspektivlərindən danışıb.

Görüşdə BDU ilə Qlazqo Universiteti arasında təhsilin müxtəlif istiqamətləri üzrə ikitərəfli əməkdaşlığın perspektivləri geniş müzakirə olunub. Qarşılıqlı anlaşma memorandumu əsasında tələbə, o cümlədən akademik və inzibati heyətin mübadiləsinin ikitərəfli əməkdaşlığın daha da genişləndirilməsində mühüm rol oynaya biləcəyi vurğulanıb.