ADAU-da bu qrupların üzvləri ilə aparılan müzakirələrdə belə qərara alınıb
Azərbaycan Dövlət Aqrar Universitetində (ADAU) 2018/2019-cu tədris ilinin payız semestrinin imtahan sessiyasının səmərəli təşkili, tələbələrin biliyinin qiymətləndirilməsi prosesinin ictimaiyyət nümayəndələri, eləcə də təhsil alan tələbələr üçün açıq olmasının təmin edilməsi məqsədilə valideyn şurası, ictimai və tələbə nəzarət qrupları yaradılıb. Universitetdə imtahan sessiyasının başlanılması ilə əlaqədar olaraq ictimai və tələbə nəzarət qruplarının üzvləri ilə görüş keçirilib.
Görüşdə çıxış edən rektor, AMEA-nın müxbir üzvü, professor İbrahim Cəfərov imtahan sessiyasının şəffaf və obyektiv keçirilməsi məqsədilə müvafiq qrupların yaradılmasının zəruriliyi, imtahan sessiyasının valideynlər, ictmiaiyyət nümayəndələri, mətbuat, bütövlükdə cəmiyyətin hər bir üzvü üçün açıq elan olunduğunu bildirməklə, qrup üzvlərinə universitet həyatında fəal iştirak etmələrini tövsiyə edib.
İctimai nəzarət qrupunun üzvlərindən “Məktəbgushesi.az” internet portalının təsisçisi və baş redaktoru Məzahir Məmmədli, “Təhsil-Press.az” İnformasiya Agentliyinin direktoru Əkbər Hüseynzadə, “Respublika” qəzetinin bölgə müxbiri Zabit Xəlilov çıxış edib, ADAU-nun ictimaiyyət nümayəndələri üçün həmişə açıq olduğunu, imtahan sessiyasına ictimai nəzarətin vacibliyini və bu istiqamətdə lazımi dəstəyi göstərəcəklərini bildiriblər.
Tələbə nəzarət qrupunun üzvlərindən “dizayn” ixtisası üzrə ikinci kurs tələbəsi Ağgül Əhmədova və başqaları çıxış edərək tələbələrin biliyinin qiymətləndirilməsi prosesində onların iştirakının təmin edilməsini yüksək qiymətləndiriblər.
Sonra qrup üzvləri ilə fəaliyyət planı, həyata keçiriləcək tədbirlər və gözlənilən nəticələr barədə müzakirələr aparılıb.