Yanvarın 25-də Psixologiya Elmi-Tədqiqat İnstitutunda Azərbaycan Respublikası Təhsil Nazirliyinin dəstəyi, Müasir Azərbaycan Psixoloqları İB və Psixologiya Elmi-Tədqiqat İnstitutunun birgə təşkilatçılığı ilə “Məktəb Psixoloqlarının I Ümumrespublika Konfransı” keçirildi. Layihə Azərbaycan Respublikası Təhsil Nazirliyi, Bakı Dövlət Universiteti, Azərbaycan Dövlət Pedaqoji Universiteti, Azərbaycan Respublikasının Təhsil İnstitutu, Təhsil İşçilərinin Peşəkar İnkişaf İnstitutu, “Məktəblinin dostu” və “Sağlam təhsil -sağlam millət” layihələri ilə qarşılıqlı əməkdaşlıq zəminində baş tutdu.
Açılış mərasimində Azərbaycan Respublikası təhsil nazirinin müavini Məhəbbət Vəliyeva təhsilin inkişafı üzrə Dövlət Strategiyasının strateji istiqamət və hədəflərindən bəhs edərək məktəblərdə psixoloji xidmətin təşkilinə və psixoloqların praktiki fəaliyyətinə dair məsələlərə toxundu. Təhsil sisteminin başlıca vəzifələrindən biri kimi milli mənəvi və ümumbəşəri dəyərlərə, geniş dünyagörüşünə malik, müsbət təşəbbüsləri və yenilikləri qiymətləndirən və dəstəkləyən, nəzəri və praktiki biliklərə yiyələnən, müasir təfəkkürlü və rəqabət qabiliyyətli şəxsiyyətin formalaşdırılmasıdır. Bu səbəbdən səriştəyə əsaslanan şəxsiyyətyönlü təhsil məzmununun yaradılması və təhsilalanların fərdi xüsusiyyətlərini nəzərə alan innovativ təlim metodları və texnologiyaları vasitəsilə təhsilin məzmununun səmərəli mənimsənilməsini təmin edən yüksək nüfuzlu təhsilverənin formalaşdırılması strateji istiqamət kimi qeyd edilmişdir. Bu işdə psixoloji xidmətin üzərinə düşən strateji hədəf və vəzifələri diqqətə çatdırdı.
Müasir Azərbaycan Psixoloqları İctimai Birliyinin İdarə heyətinin sədri, AMEA-nın müxbir üzvü, professor Bəxtiyar Əliyev çıxış edərək Psixologiya Elmi-Tədqiqat İnstitutunun yaradılmasında verdiyi böyük dəstəyə və məktəb psixoloqlarının I ümumrespublika konfransının baş tutmasına görə Təhsil Nazirliyinə təşəkkürünü bildirdi. O, təhsil haqqında qanunda məktəbdə psixoloji xidmətin təşkilinə dair edilən əlavələrə toxunaraq qeyd etdi ki, hazırda dövlətin və təhsil nazirliyinin bu sahəyə diqqəti kifayət qədər böyükdür. İlk dəfə olaraq məktəbdə psixoloji xidmətin təşkili qaydalarının hazırlanaraq nazirlər kabinetinin təsdiqinə verilməsini, bunun bariz nümunəsi kimi göstərdi. Bu aspektdən gələcəkdə məktəb psixoloqlarının statuslarının yüksəldilməsi və onların fəaliyyətinin stimullaşdırılmasına dair məsələlərə aydınlıq gətirdi. Eyni zamanda bunun qarşılığı olaraq məktəb psixoloqlarının öhdələrinə düşən vəzifələr barədə geniş məlumat verdi.
Daha sonra Psixologiya Elmi-Tədqiqat İnstitutu MMC-nin sədri Elnur Rüstəmov, Bakı Dövlət Universiteti, Sosial Elmlər və Psixologiya fakültəsinin dekanı, professor Hikmət Əlizadə, professor Ramiz Əliyev, Vəfa Yaqublu, dosent Elxan Bəylərov, Aynur Bünyatova, Diyanə İbrahimova, Bahar Bəylərova, Mehriban Verdiyeva və Raziyə Quliyeva məruzələrlə çıxış etdilər.
Konfransda ixtisasartırma və yenidən hazırlanma, məktəb psixoloqlarının hazırlığı, məktəbdə psixoloji xidmətə yeni baxış, sağlam təhsildə psixogigiyena, psixoloq hazırlığı, ruhda “kağız kəsiyi” izlər, məktəbdə aşkar olunan psixoloji problemlər, təxəyyül məktəbinə keçid mövzularında məruzələr dinlənildi.
Sonda təntənəli bağlanış mərasimi və sertifikatların təqdimimatı baş tutdu. Bağlanış mərasimində Müasir Azərbaycan Psixoloqları İctimai Birliyinin İdarə heyətinin sədri, AMEA-nın müxbir üzvü, professor Bəxtiyar Əliyev yekun nitq söyləyərək konfrans iştirakçılarına təşəkkürünü bildirdi və məktəb psixoloqlara işlərində uğurlar arzuladı.
Qeyd edək ki, konfrans işinə başlamamışdan əvvəl Təhsil Nazirliyinin rəsmiləri və digər qonaqlar Psixologiya Elmi-Tədqiqat İnstitutunun infrastrukturu, onun nəzdində fəaliyyət göstərən mərkəz və şöbələrin fəaliyyəti ilə maraqlanmışlar. Qonaqlara institutun xidmət göstərdiyi fəaliyyət sahələri barədə də geniş məlumat verilmişdir. İnstitutun zəngin kitabxanası da qonaqların marağına səbəb olmuşdur.
Elxan BƏYLƏROV,
Psixologiya Elmi-Tədqiqat İnstitutu, Təhsilə Psixoloji Dəstək Mərkəzinin direktoru