Azərbaycan Texniki Universiteti (AzTU) ilə “Improtex Trucks & Busses” MMC arasında əməkdaşlıq haqqında memorandum imzalanıb.
Universitetdən bildirilib ki, sənədə rektor Vilayət Vəliyev və şirkətin direktoru Fərid Abdullayev imza atıb.
Memoranduma əsasən, tərəflər logistika sahəsində elmi-texniki, innovativ və texnoloji yeniliklərin tətbiqi istiqamətində əməkdaşlıq edəcək.
Əməkdaşlıq çərçivəsində şirkət universitetin gənc startapçılarının layihələrinin reallaşdırılması və icrasına dəstək göstərəcək. Bundan başqa, xarici ölkələrin aparıcı ali təhsil müəssisələrinin bu sahə üzrə mütəxəssislərinin qısa müddətli təlimlərin keçirilməsi üçün universitetə dəvət olunması da nəzərdə tutulub.
Sənədə əsasən, AzTU-nun bakalavr, magistr, doktorantura pillələrində təhsil alan müasir düşüncəli, mütərəqqi texnologiyaların tətbiqini mənimsəyən tələbələri şirkətdə işlə təmin olunacaq.