15 İyun- Milli Qurtuluş Günü münasibəti ilə Azərbaycan Memarlıq və İnşaat Universitetinin (AzMİU) əməkdaşları müasir Azərbaycan dövlətinin qurucusu, dahi şəxsiyyət Heydər Əliyevin adını daşıyan “Heydər Əliyev zirvəsi”nə yürüş ediblər.
Universitetdən bildirilib ki, AzMİU əməkdaşları Azərbaycanın ən yüksək yaşayış məntəqəsi olan Xınalıq kəndindən piyada start götürüb, dəniz səviyyəsindən 3751 yüksəklikdə yerləşən zirvəni fəth ediblər.
AzMİU-nun sosial məsələlər və ictimaiyyətlə əlaqələr üzrə prorektoru Orxan Naqdiyev, Tələbə Həmkarlar İttifaqı Komitəsinin sədri Bayram Aslanov, İtaliya-Azərbaycan Dizayn Mərkəzinin direktoru Fərid Kərimov Azərbaycan bayrağını “Heydər Əliyev zirvəsi”ndə dalğalandırıblar.
Böyük Qafqazın Başdağ silsiləsinin Qızıl Qaya massivinin mürəkkəb relyefinə baxmayaraq, Ümummilli Liderin adını daşıyan zirvəyə qalxan universitet əməkdaşları Ulu Öndərin barelyefi önünə gül dəstələri düzüb, əziz xatirəsini ehtiramla yad ediblər.