Prezident təqaüdçüləri təəssüratlarını bölüşürlər
Xəbər verildiyi kimi Prezident İlham Əliyev 2023-2024-cü tədris ilində Azərbaycanda ali məktəblərə daxil olmuş tələbələrə Prezident təqaüdünün verilməsi haqqında Sərəncam imzalayıb. Sərəncama əsasən bu tədris ilində tələbə qəbulu imtahanlarında ixtisas qrupları üzrə ən yüksək nəticələr göstərmiş və ali məktəblərə daxil olmuş 102 tələbə Prezident təqaüdü alacaq. Həmin təqaüdçülərdən bir neçə tələbələri oxuculara təqdim edirik.
Ləman Quliyeva, Prezident təqaüdçüsü, ADA -nın riyaziyyat fakültəsinin I kurs tələbəsi: 2006-cı ildə Bakıda anadan olub. Nəsimi Rzayev adına 169 nömrəli tam orta məktəbi fərqlənmə attestatı ilə bitirib. I və IV ixtisas qrupları üzrə 22-23 iyul tarixlərində keçirilən qəbul imtahanında I ixtisas qrupu üzrə ən yüksək nəticə göstərib. İmtahanın ikinci mərhələsində 395.5 bal, birinci mərhələsində isə 297.5 bal olmaqla ümumilikdə I ixtisas qrupu üzrə 693 bal toplayıb. Hazırda gənc tələbə ADA Universitetində riyaziyyat ixtisası üzrə təhsil alır. Prezident təqaüdünə layiq görüldüyünü eşidəndə sevincinin hədd-hüdudu olmayıb, qürur hissi keçirib. Sevinir ki, valideynləri onunla fəxr edir. Bundan böyük xöşbəxtlik mənim üçün nə ola bilər?-deyir. Prezident təqaüdçüsü gələcəkdə magistr təhsilini xaricdə davam etdirmək arzusunda olduğunu söyləyir.
ADA Universitetinin rektoru Hafiz Paşayev Ləman Quliyevanı qəbul edərək DİM imtahanında 650-dən yuxarı bal topladığına görə onu təhsil haqqından azad edib.
Nuranə Payızova, Prezident təqaüdçüsü, Bakı Dövlət Universitetinin mexanika-riyaziyyat fakültəsinin I kurs tələbəsi: Sumqayıtdakı 5 nömrəli tam orta məktəbi bitirib. Bu il keçirilən qəbul imtahanlarında 677,1 bal toplayaraq Bakı Dövlət Universitetinin mexanika-riyaziyyat fakültəsinə qəbul olunub. Bu gün də öz həyəcanını gizlədə bilmir: “ Bu şad xəbər məni hədsiz sevindirdi. Zəhmətimin hədər getməməsi mənə sanki bir dünya bağışladı”. Onunla həmsöhbət olarkən gənc tələbənin qazandığı uğurlardan məmnunluğu mənim də əhvalıma xoş ovqat qatırdı. Həm ali məktəbə qəbul olunduğuna, həm də Prezident təqaüdünə layiq görüldüyünə görə gənc tələbə ikiqat sevinc hissi yaşayırdı. Nuranə özü bu barədə belə dedi:
“Bu təqaüdü qazanmaq çoxdankı arzum idi və nəhayət ki, reallaşdı. Özümə qarşı çox tələbkar olmuşam. Sınaq imtahanlarından da yüksək nəticə əldə edirdim. Buna görə də qəbul imtahanlarından yüksək bal toplayacağıma əmin idim. Riyaziyyat bütün elmlərin açarıdır. Bu fənlə bağlı keçirilən bütün bilik yarışmalarına qatılmışam və uğur qazanmışam. Müəllim peşəsi şərəflidir, müqəddəsdir. Ən böyük arzum BDU-nun tələbəsi adını qazanmaq idi, onu da qazandım. İnsanlara bilik vermək, elm öyrətmək, onları həyata düzgün istiqamətləndirmək kimi mühüm vəzifənin öhdəsindən ancaq müəllim gələ bilər. Elə ona görə də olduqca şərəfli və məsuliyyətli işdir müəllimlik. Yaxşı müəllim olmaq üçünsə gərək savadlı, bacarıqlı olasan. Arzum gələcəkdə magistratura təhsili almaq, şagirdlərimə riyaziyyat fənnini sevdirməkdir”.
Prezident təqaüdünə layiq görülən tələbələrdən biri də Fizika, riyaziyyat və informatika təmayüllü respublika liseyinin məzunu Fatimə Əliyevadır. Oxuduğu müddətdə çox çalışqan, özünə qarşı tələbkar savadlı, nümunəvi şagirdlərdən biri olub. Liseyi əla qiymətlərlə başa vurub. Müxtəlif layihələrdə, olimpiadalarda və müsabiqələrdə iştirak edib. Dəfələrlə informatika və riyaziyyatdan olimpiadalara qatılıb, məktəbdaxili və şəhərlərarası yarışlarda iştirak edərək birincilik qazanıb. 2023-cü ildə liseyi fərqlənmə attestatı ilə bitirib, 679,6 balla Bakı Ali Neft Məktəbinə İnformasiya təhlükəsizliyi ixtisasına yiyələnib: “Sərəncamda adları çəkilən tələbələr arasında adımı gördükdə cox sevindim. Prezident təqaüdçüsü kimi gələcək planlarım çoxdur, bakalavr səviyyəsini bitirdikdən sonra təhsilimi xaricdə davam etdirəcəyəm”.
Sifai SƏFƏROVA