Müqavilə çərçivəsində geniş əməkdaşlıq planlarının olduğu qeyd edilib
UNEC və Lənkəran Dövlət Universiteti (LDU) arasında ikili diplom proqramı haqqında müqavilə imzalanıb. UNEC rektoru, professor Ədalət Muradov və LDU rektoru vəzifəsini icra edən professor Natiq İbrahimov tərəfindən imzalanmış müqaviləyə əsasən ikili diplom proqramının məqsədi UNEC və LDU arasında əməkdaşlığı, tələbə-müəllim mübadiləsini və əmək bazarının tələblərinə uyğun yüksək hazırlıqlı məzun buraxılışını təmin etməkdir.
İmzalanma mərasimində UNEC rektoru, professor Ədalət Muradov, Təhsil Nazirliyində keçirilmiş kollegiya zamanı təhsil naziri Ceyhun Bayramovun ölkədə fəaliyyət göstərən universitetlər arasında əməkdaşlığın genişləndirilməsinə dair tapşırığının əhəmiyyətini qeyd edib. Cari müqavilənin bu tapşırığın icrası kimi qiymətləndirilməli olduğunu vurğulayan rektor UNEC-in artıq bir sıra universitetlərlə əməkdaşlıq müqaviləsi imzaladığını qeyd edib. Bakı və regionlarda fəaliyyət göstərən universitetlər ilə əməkdaşlıq təkliflərinə hazır olan UNEC bu istiqamətdə əməkdaşlıq şəbəkəsinin genişləndirilməsinin nəzərdə tutub.
Bağlanmış müqavilə çərçivəsində geniş əməkdaşlıq planlarının olduğunu deyən rektor tədrisin keyfiyyətinin daha da artırılması məqsədi ilə UNEC-də olduğu kimi LDU-da da islahatların aparıldığını bildirib. LDU tədris planının UNEC-in tədris planına tamamilə uyğun olduğunu bildirən rektor, tələbə və müəllim mübadiləsi üçün zəruri şəraitin yaradıldığını qeyd edib. Tələbələr tərəfdaş universitetin beynəlxalq mübadilə və ikili diplom proqramlarında iştirak etmək hüququna malikdirlər. UNEC-in London İqtisad Məktəbi və Fransanın Monpelye Universiteti və digər tanınmış xarici universitetlərlə ikili diplom proqramlarından LDU tələbələri də yararlana bilərlər.
Tələbənin qəbul imtahanları zamanı qazandığı bal ikili diplom proqramında iştirak üçün əhəmiyyət kəsb etmir. Proqramda iştirak edəcək tərəfdaş universitetlərin tələbələri 240 kredit qazanılması ilə bakalavr təhsilini bitirərək hər iki universitetin müvafiq ixtisaslar üzrə diplomlarını əldə edə biləcəklər. Proqramda tərəfdaş universitetlərin “İqtisadiyyat” və “Biznesin idarə edilməsi” ixtisasları üzrə əyani təhsil formasında Azərbaycan dili bölməsi üzrə təhsil alan tələbələri iştirak edə bilər. Tələbələr proqrama I tədris ilinin sonunda müraciət etməli və bu zamana qədər nəzərdə tutulan 60 krediti toplamalı, onun ümumi orta müvəffəqiyyət göstəricisi 81-dən yuxarı olmalı, tələbə öz universiteti tərəfindən tövsiyə edilməlidir. Proqramda iştirak edən tələbə tədris ilinin əvvəlində üç nüsxədən ibarət Fərdi Tədris Planını (FTP) tərtib edir. Proqramına qoşulanlar, hər iki qurumda qeydiyyata alınırlar və digər tələbələrlə eyni hüquq və vəzifələrə malik olurlar.
Lənkəran Dövlət Universitetinin rektoru vəzifəsini icra edən professor Natiq İbrahimov çıxışında LDU-da həyata keçirilən işlər barədə məlumat verib. Universitetin turizm bazasının yaradılması, müasir otelin fəaliyyəti burada turizm ixtisası üzrə təhsil alan tələbələrə təcrübə keçmək imkanı yaradır. LDU-da müasir qida təhlükəsizliyi laboratoriyasının fəaliyyətinin UNEC-də müvafiq ixtisaslar üzrə təhsil alan tələbə və müəllim heyəti üçün əlavə imkanlar yaratdığı qeyd olunub.
