Proqramı qazanan tələbələr gələcəkdə bu şirkətdə işləmək imkanı əldə edirlər
Azərbaycan Texniki Universitetində (AzTU) Azərbaycan Respublikası Dövlət Neft Şirkətinin İnsan Resursları Departamentinin məsul işçiləri-Vasif Cəfərov və Nəzrin Əfəndiyeva SOCAR-ın Daxili Təqaüd Proqramının təqdimatını keçiriblər.
Tədbiri giriş sözü ilə açan AzTU-nun Tərbiyə işləri üzrə prorektoru, professor İsa Xəlilov Neft şirkətinin gənclərlə bağlı layihələrinin üstünlüklərindən və əhəmiyyətindən danışaraq AzTU-nun ənənəvi olaraq bu layihələrdə iştirakını vurğulayıb. Prorektor qeyd edib ki, Təqaüd Proqramını qazanan tələbə gələcəkdə SOCAR-da işləmək imkanı eldə edə bilər.
Şirkətin əməkdaşı Vasif Cəfərov SOCAR-ın həyata keçirdiyi Daxili Təqaüd Proqramı və Təcrübə Proqramı haqqında tələbələrə ərtaflı məlumat verib. Bildirib ki, Təqaüd Proqramını şirkət istedadlı gənc mütəxəssislərin yetişdirilməsi, tələbələrin sənaye sahəsində müasir elmi və təcrübi biliklərə yiyələnməyə həvəsləndirilməsi məqsədilə həyata keçirir.
Tədbirdə Təqaüd Proqramına uyğun ixtisaslarda yüksək balla təhsil alan tələbələr iştirak edib.
Sonda tələbələri maraqlandıran suallar cavablandırılıb.
