Zeynəb Həcəmova

The head specialist at Humanitar Department of ANAS

Zeynəb Həcəmova

Zeynəb Əhməd qızı Həcəmova 1990-cı ilin 7 mart tarixində Azərbaycanda, Bakı şəhərində ziyalı ailəsində anadan olmuşdur. 1996-2005-ci illərdə İlyas Əfəndiyev adına Elitar gimnaziyada, 2005-2007-ci illərdə Həbibbəy Mahmudbəyov adına 2 saylı texniki-humanitar elmlər liseyində orta təhsil almışdır. 2007-ci ildə Azərbaycan Dövlət Pedaqoji Universitetinə (indiki) daxil olmuş, 2011-ci ildə həmin universitetin pedaqogika və psixologiya ixtisası üzrə bakalavr təhsilini bitirmişdir. 2016-2018-ci-illərdə Xəzər Universitetində ümumi psixologiya ixtisası üzrə magistratura təhsilini ingilis dilində almışdır. 2011-2012-ci illərdə Ümidli Gənclər Təşkilatının Uşaq və gənclər üçün reabilitasiya mərkəzində könüllü psixoloq kimi fəaliyyət göstərmişdir. 2012-2014-cü illərdə “Gənc Psixoloqlar” ictimai birliyinin üzvüdür. 2024-cü ildən “İMZA” Sosial İnkişafa Dəstək İctimai Birliyinin üzvüdür. 2024-cü ildən “Yeni Azərbaycan Partiyası”nın üzvüdür. 2025-ci ildən “QEYD” Sosial Maarifləndirmə İctimai Birliyinin üzvüdür. 2025-ci ildən BMT-nin könüllü üzvüdür. 2025-ci ildən “Azərbaycan Respublikası Təhsil Cəmiyyəti”nin üzvüdür. 2012-ci ildə AMEA-nın akademik Yusif Məmmədəliyev adına Neft-Kimya Prosesləri İnstitutunda Sənədlərlə iş şöbəsinin müdiri vəzifəsində fəaliyyət göstərmişdir. 2013-cü ildə AMEA-nın akademik Yusif Məmmədəliyev adına Neft-Kimya Prosesləri İnstitutunda təşkil edilən Ümummilli lider Heydər Əliyevin 90 illik yubileyinə həsr edilmiş məqalə müsabiqəsində iştirak etmiş və 2-ci yerə layiq görülərək təltif olunmuşdur. 2016-cı ildə AMEA Rəyasət Heyəti aparatının Katibliyinin rəisi vəzifəsinə təyin olunmuşdur. 2018-2020-ci illərdə Bakı Dövlət Universitetində ümumi psixologiya fənnini (saat hesabı) tədris etmişdir. 2019-cu ildən AMEA-nın Fəlsəfə və Sosiologiya İnstitutunun dissertantıdır (elmi seminar təşkil edilib və müdafiə ərəfəsindədir). Azərbaycan Milli Elmlər Akademiyasının elmi və ictimai həyatında səmərəli fəaliyyətinə görə AMEA İctimai Elmlər Bölməsinin “Fəxri Fərmanı” ilə təltif edilib. Azərbaycan xalqının Ümummilli Lideri Heydər Əliyevin həyatı və fəaliyyətinin, zəngin irsinin, dövlətçilik ideallarının tədqiqi və təbliği sahəsində xidmətlərinə görə Azərbaycan Milli Elmlər Akademiyasının “Təşəkkürnamə”si ilə təltif edilib. 2025-ci ildə AMEA-nın “İlin gənc alimi” mükafatı müsabiqəsində iştirak edərək gənc alimlər arasında elmi fəaliyyəti ilə fərqləndiyinə və AMEA-nın ictimai işlərində fəallıq göstərdiyinə görə “İlin gənc alimi” diplomuna layiq görülmüşdür. 2025-ci ildə AMEA-nın elmi və ictimai fəaliyyətində fərqləndiyinə görə və 8 mart Beynəlxalq Qadınlar günü münasibətilə AMEA-nın “Təşəkkürnamə”si ilə təltif edilmişdir. 2022-ci ildən etibarən AMEA Humanitar Elmlər Bölməsində vitse-prezidentin xidmətində baş mütəxəssis vəzifəsində fəaliyyət göstərir. AMEA-da göstərdiyi 12 illik nümunəvi fəaliyyəti dövründə Zeynəb Həcəmova elmi və ictimai fəaliyyəti ilə fərqlənmiş, AMEA-nı bir sıra respublika və beynəlxalq miqyaslı tədbirlərdə təmsil etmişdir. Ailəlidir, 2 övladı var.