Fevralın 10-da Təhsil Nazirliyi yanında İctimai Şurada ümumtəhsil müəssisələrində məktəbli formasının tətbiqinə dair müzakirələr keçirilib. 

Tədbirdə Təhsil nazirinin müavinləri Məhəbbət Vəliyeva,  İdris İsayev, Təhsil nazirinin müşaviri Elnur Məmmədov, nazirliyin Ümumi və məktəbəqədər təhsil şöbəsinin müdiri Vəfa Yaqublu, İctimai Şuranın üzvləri, istehsalçı şirkətlərin mütəxəssisləri və KİV nümayəndələri iştirak edib.

Tədbirdə çıxış edən Təhsil nazirinin müavini  İdris İsayev qeyd edib ki,   təhsil sahəsində aparılan islahatlar cəmiyyət tərəfindən daim izlənilir.  Təhsildə həyata keçirilən hər bir islahat istiqaməti ictimaiyyətdə  müzakirə olunur.  Nazir müavini   məktəbli formasının tətbiqi məsələsinə, bunun ictimai müzakirəsinin vacibliyinə Təhsil Nazirliyinin ciddi yanaşdığını bildirib.

Təhsil nazirinin müavini Məhəbbət Vəliyeva bildirib ki, vahid məktəbli formalarının  təsvirləri ictimaiyyətə təqdim olunmazdan əvvəl  məktəblərin pedaqoji kollektivləri, valideynlərlə  müzakirələr keçirilib. M.Vəliyeva  müzakirələr zamanı  ən çox səsləndirilən təkliflər barədə məlumat verib.

Daha sonra çıxış edən mütəxəssislər məktəbli formalarının tətbiqi ilə bağlı mövcud standartlar və keyfiyyət məsələləri ilə bağlı öz fikirlərini səsləndiriblər. 

Tədbirdə  məktəbli formalarının hazırlanması üzrə təkliflər paketinin  işlənib hazırlanması, optimal variantın tapılması və baxılmaq üçün İctimai Şuraya təqdim olunması təklif  edilib.

Oruc MUSTAFAYEV