Azərbaycan Respublikasının Təhsil İnstitutunun, İnnovasiya və Rəqəmsal İnkişaf Agentliyinin təşkilati dəstəyi və  “ÖzünÖyrən” MMC-nin rəsmi təşkilatçılığı ilə informatika və rəqəmsal inkişafın təbliğinə yönələn, 2024-2025-ci tədris ilində keçirilən Bebras İnformatika və Alqoritmik Düşüncə Müsabiqəsi uğurla başa çatıb. Cari il üzrə müsabiqədə ölkə üzrə rekord sayda 69 şəhər və rayondan 376 məktəbi təmsil edən 17564 şagird iştirak edib.

“Azərbaycan müəllimi” xəbər verir ki, bu barədə Təhsil İnstitutu məlumat yayıb.

Beynəlxalq “Bebras” informatika və alqoritmik müsabiqəsi proqramlaşdırma bilikləri tələb etmədən şagirdlərin alqoritmik və məntiqi təfəkkürünü qiymətləndirmək məqsədi daşıyan layihədir. Müsabiqə şagirdlərə informatika ilə yanaşı məntiq və riyaziyyat üzrə bilik və bacarıqlarını inkişaf etdirməyə və sağlam rəqabət aparmağa imkan yaradır. Onlayn müsabiqə zamanı I-X sinif şagirdləri 40 dəqiqə ərzində öz yaş qruplarına uyğun əyləncəli formada müxtəlif tapşırıqların həllinin tapılması üçün yarışıblar. 

2025-ci ilin əvvəllərində Bebras müsabiqəsinin final mərhələsi keçiriləcək. Hər yaş qrupunda ən yaxşı nəticə göstərən şagirdlər final mərhələsində iştirak edəcək və burada qaliblər müəyyən olunaraq mükafatlandırılacaq.

Bebras müsabiqəsi Azərbaycanda informatika biliklərinin geniş təbliği və təhsildə rəqəmsal savadlılığın artırılması istiqamətində mühüm bir təşəbbüsdür. Gələcəkdə müsabiqənin daha da genişləndirilməsi və daha çox şagirdin bu platformadan faydalanması üçün tədbirlər görüləcək.

Qeyd edək ki, “Bebras” müsabiqəsi 2004-cü ildən başlayıb. Dünyanın 70-dən çox ölkəsində yüz minlərlə şagirdin iştirak etdiyi müsabiqə Azərbaycanda  2014-cü ildən etibarən keçirlilir.

Nəzərinizə çatdıraq ki, müsabiqə 2023-cü ildə 61 rayon və şəhərdən 242 məktəbi əhatə edib və 5395 şagird iştirak edib. Ən yüksək bal toplamış şagirdlər 2024-cü ilin aprel ayında İnnovasiya və Rəqəmsal İnkişaf Agentliyi tərəfindən keçirilən final mərhələsinə dəvət olunub və qaliblər qiymətli hədiyyələrlə təltif ediliblər.

Müsabiqə haqqında daha ətraflı məlumat üçün http://bebras.az vebsaytından istifadə edə bilərsiniz.