Avqustun 21-də ümumi təhsil müəssisələrində metodik xidmətin təkmilləşdirilməsi istiqamətində ibtidai sinif müəllimləri və məktəb metodistlərinin iştirakı ilə “İbtidai təhsildə şagird nailiyyətlərinin artırılması üçün tədris prosesində zəruri dəyişikliklər” mövzusunda görüş keçirilib.

Təhsil İnstitutundan “Azərbaycan müəllimi”nə bildirilib ki, İnstitutunun direktoru səlahiyyətlərini icra edən Elnur Əliyevin iştirakı ilə təşkil olunan görüşdə ibtidai siniflərdə tədris prosesinin mövcud vəziyyəti, şagirdlərin nailiyyət göstəriciləri və qarşıda duran çağırışlar ətraflı təhlil olunub. Görüş zamanı müəllim və metodistlər öz təcrübələrini bölüşərək mövcud çətinlikləri səsləndiriblər və yeni yanaşmalarla bağlı fikir və təkliflərini irəli sürüblər.

Görüş zamanı xüsusilə şagird nailiyyətlərinin artırılmasına xidmət edə biləcək əsas istiqamətlər ön plana çəkilərək, müəllimlərin davamlı peşəkar inkişafının təmin edilməsi, tədrisdə diferensiallaşdırılmış yanaşmaların tətbiqi, valideynlərlə əməkdaşlığın gücləndirilməsi kimi mühüm məqamlar müzakirə olunub.

Bu istiqamətlər üzrə həyata keçiriləcək addımlar ibtidai təhsilin keyfiyyətinə, müəllim fəaliyyətinin dəstəklənməsinə və nəticə etibarilə şagirdlərin uğurlarının artmasına töhfə verəcək.

Görüş iştirakçıların fəal iştirakı və səmərəli fikir mübadiləsi ilə davam etdirilib.