""Azərbaycan Respublikasının 2022-2026-cı illərdə sosial-iqtisadi inkişaf Strategiyası"nda dayanıqlı və aşağı karbonlu təhsil sistemlərinin qurulmasına böyük diqqət yetirilib. Bundan əlavə, “Böyük Qayıdış” Dövlət Proqramı vasitəsilə biz işğaldan azad edilmiş Qarabağda dayanıqlı inkişafı dəstəkləməyə, təhsil və innovasiyanın inkişaf edə biləcəyi möhkəm icmalar yaratmağa yönəlmişik. Biz bu ərazilərdə təhsil və innovasiyalar üçün əlverişli şərait yaratmağa çalışırıq. Məqsədimiz dayanıqlı icmalar formalaşdırmaq və bölgədə təhsil vasitəsilə inkişafa töhfə verməkdir".

“Azərbaycan müəllimi” xəbər verir ki, bunu elm və təhsil naziri Emin Əmrullayev COP29 çərçivəsində “İqlim dayanıqlılığı üçün insan inkişafı üzrə Bakı Təşəbbüsü” mövzusunda keçirilən birgə iclasda deyib.

E.Əmrullayev həmçinin çıxışında beynəlxalq əməkdaşlığın əhəmiyyətinə də diqqət çəkib:

"UNESCO və OECD kimi təşkilatlarla birgə Azərbaycanın təhsil sistemində iqlim göstəricilərinin beynəlxalq qiymətləndirmələrə (PISA) inteqrasiyası və daha yaşıl təhsil yanaşmalarına keçid istiqamətində işlər davam etdirilir. Bu tədbirlər çərçivəsində kurikulumun yenilənməsi, müəllim hazırlığının təkmilləşdirilməsi və davamlılıq prinsiplərini təşviq edən məktəblərin yaradılması əsas məqsədlərdəndir", - deyə nazir vurğulayıb.