25-26 noyabr tarixlərində Məktəbəqədər və Ümumi Təhsil üzrə Dövlət Agentliyi (MÜTDA) və “Təhsil” Respublika İdman Mərkəzinin təşkilatçılığı ilə Zəngilan rayonu Ağalı kənd tam orta məktəbi və Laçın rayon 2 nömrəli tam orta məktəbinə səfərlər təşkil olunub.

“Azərbaycan müəllimi” xəbər verir ki, bu barədə MÜTDA məlumat yayıb. Bildirilib ki, səfərdə “Təhsil” Respublika İdman Mərkəzinin əməkdaşları, məşqçi-müəllimlər, fiziki tərbiyə müəllimləri və tanınmış idmançılardan ibarət heyət iştirak edib.

Tədbir zamanı elm və təhsil nazirinin müşaviri, “Təhsil” Respublika İdman Mərkəzinin direktoru Rüstəm Ağayev çıxış edib, təhsil sahəsində çalışan və idman sahəsində yüksək nəticə əldə edən idmançılar məktəblilərə uğur hekayələrindən danışıb, onları maraqlandıran sualları cavablandırıblar. 

Bununla yanaşı idman festivalı çərçivəsində təhsil alan məktəblilərin iştirakı ilə basketbol, futbol, badminton idman növləri üzrə yarışlar keçirilib. 

Qeyd edək ki, TOPs proqramına uyğun estafet oyunları təşkil edilib, iştirakçılara mükafatlar və sertifikatlar təqdim olunub.

Festivalın keçirilməsinin məqsədi işğaldan azad olunmuş ərazilərdə təhsilalanlar arasında sağlam həyat tərzinin təbliği, idmana olan marağın artırılması, vətənpərvərlik ruhunun yüksəldilməsidir.