Dağlıq Şirvan Regional Təhsil İdarəsinin tabeliyində fəaliyyət göstərən ümumtəhsil müəssisəsində istilik sistemlərinin cari təmir işləri aparılır.

Regional İdarədən "Azərbaycan müəllimi"nin sorğusuna cavab olaraq bildirilib ki, Dağlıq Şirvan-Salyan Regional Təhsil İdarəsinin tabeliyində fəaliyyət göstərən, istilik sistemi ilə bağlı problem olan ümumtəhsil müəssisəsində istilik sistemlərinin cari təmir işləri aparılır.

Region üzrə 26 təhsil müəssisəsi odunla qızdırılır. Bunlardan Qobustan rayonunda 1 ümumtəhsil məktəbi, İsmayıllı rayonunda 10 məktəb, 1 uşaq bağçası olmaqla 11 təhsil müəssisəsi, Ağsu rayonunda 3 məktəb, 2 uşaq bağçası olmaqla 5 təhsil müəsisəsi, Şamaxı rayonu üzrə isə 3 məktəb, 6 uşaq bağçası, olmaqla 9 təhsil müəssisəsinin istiliyi odunla təmin olunur. Hazırda Şamaxı rayonunda  yerləşən 10 məktəb, 3 uşaq bağçasında, o cümlədən Qobustan rayonunda yerləşən 1 uşaq bağçasında və Ağsu rayonunda yerləşən 1 uşaq bağçasında istilik sistemlərinin təmir işləri aparılır.

Bildirilib ki, təhsil müəssisələrində istilik təchizatı ilə bağlı cari təmir işlərinin yekunlaşdırılması, həmçinin odunla qızdırılan məktəblərin zəruri odun təchizatı ilə təmin olunması, ümumilikdə qış mövsümünə hazırlıq işlərinin 15 noyabr 2024-cü il tarixə qədər başa çatdırılması nəzərdə tutulur.