“IV ixtisas qrupuna sənəd verənlərin sayının digər ixtisas qrupları ilə müqayisədə az olmasına baxmayaraq, ən gərgin müsabiqə vəziyyəti məhz bu qrupdadır”.

“Azərbayan müəllimi” xəbər verir ki, bu sözləri Dövlət İmtahan Mərkəzinin sədri Məleykə Abbaszadə abituriyentlərə videomüraciət zamanı deyib. 

O bildirib ki, I və III ixtisas qruplarına sənəd verənlərlə müqayisədə IV qrupun abituriyentlərinin nəticələri daha yüksəkdir:
“Hazırda imtahanın ikinci mərhələsi üzrə 100-dən az bal toplamayan və ümumi balları 200-dən aşağı olmayan abituriyentlərin sayı 4 550 nəfərdir. IV qrupda isə 4 732 plan yeri təqdim olunub. Lakin bu o demək deyil ki, hər bir abituriyent öz istədiyi ixtisasa qəbul olacaq. Çünki 4 550 nəfərdən təxminən 3 000, bəlkə də, 4000 nəfəri yalnız “Tibb” ixtisasına qəbul olmaq məqsədilə bu ixtisas qrupuna sənəd verir”.

DİM sədri bildirib ki, bu qrup üzrə 600 baldan yuxarı nəticə göstərənlərin sayı 1000-ə yaxınlaşıb: “Fikir verin, müsabiqəyə buraxılanların sayı 4 550 nəfərdir və onların təxminən 968 nəfəri 600 baldan yuxarı nəticə göstərib. Bu, çox yaxşı rəqəmdir və istedadlı uşaqlarımızın olduğunu göstərir. Eyni zamanda, 500 baldan yuxarı nəticə göstərənlərin sayına da nəzər salaq. IV ixtisas qrupunda ümumilikdə 4 550 nəfər müsabiqəyə qatılıb və onların təxminən 2135 nəfəri 500 baldan yuxarı nəticə əldə edib”. 

O, tibb sahəsini seçən abituriyentlərə müraciət edib: “Onlar bu qrupdakı universitetlərin digər ixtisaslarına da diqqət yetirsinlər və fərqli ixtisas variantlarını nəzərdən keçirsinlər. Çünki burada yeni ixtisaslar mövcuddur və ola bilsin ki, ənənəvi ixtisaslardan fərqlənirlər. Məsələn, ənənəvi ixtisaslar sırasında stomatologiya var, lakin yeni ixtisaslar da əlavə olunub, bunlar ictimai səhiyyə, fizioterapiya və tibb bacısı/qardaşı ixtisaslarıdır”.

Məleykə Abbaszadə qeyd edib ki, bu sahələr üzrə də təhsil almaq və sonradan həm fizioterapiya, həm ictimai səhiyyə, həm də tibb sahəsində müəyyən nailiyyətlər əldə etmək mümkündür.