“Azərbaycan Respublikasının ərazisi vahiddir, toxunulmazdır və bölünməzdir” adlı esse müsabiqəsi qaliblərinin mükafatlandırılma mərasimi keçirilib.

Bu barədə BŞTİ-dən “Azərbaycan müəllimi”nə məlumat verilib.

Bildirilib ki, Bakı Şəhəri üzrə Təhsil İdarəsinin (BŞTİ) tabeliyindəki 5 nömrəli Uşaq-Gənclər İnkişaf Mərkəzinin təşkilatçılığı və Nəsimi Rayon İcra Hakimiyyətinin (RİH) dəstəyi ilə keçirilən müsabiqə “Konstitusiya və Suverenlik İli”nə həsr olunub.

Mükafatlandırılma tədbirində Yeni Azərbaycan Partiyasının Nəsimi Rayon Təşkilatının sədri Azər Süleymanov, Nəsimi RİH başçısının müavini Gülarə Verdiyeva, BŞTİ-nin Məktəbdənkənar fəaliyyətin təşkili sektorunun müdiri Günay Qurbanova, Qarabağ Müharibəsi Əlilləri, Veteranları və Şəhid Ailələri İctimai Birliyinin Nəsimi rayon şöbəsinin sədri Azər Quliyev iştirak ediblər.

Əvvəlcə mərkəzin “Təsviri sənət və dizayn”, “Dekorativ tətbiqi sənət” və “Modelyer-rəssam” dərnək üzvlərinin rəsm və əl işlərindən ibarət sərgiyə baxış keçirilib.

Tədbirin bədii hissəsində dərnək üzvlərindən ibarət ”Zirvə” yaradıcılıq kollektivinin vokal və rəqs qrupları çıxış ediblər.

Qonaqlar müsabiqə qaliblərini təbrik edib və onlara uğurlar arzulayıblar.

Qeyd edək ki, esse müsabiqəsində 240 nömrəli məktəbin şagirdi Sibel Mürşüdlü I, 19 nömrəli məktəbin şagirdi Əsmər Quliyeva, 16 nömrəli Texniki-Humanitar Liseyin şagirdi Xədicə Əmiraslanlı II, 5 nömrəli məktəbin şagirdi Gülay Cəfərzadə, 111 nömrəli məktəbin şagirdi Mədinə Koxayeva III yerə layiq görülüblər.

Həmçinin 42 nömrəli məktəbin şagirdi Yusif Verdiyev, 247 nömrəli məktəbin şagirdləri Leyla Pamukçu və Nərgiz Səlimli, 35 nömrəli məktəbin şagirdi İlkayə Rzazadə, 46 nömrəli məktəbin şagirdi Tunar Quliyev, 14 nömrəli məktəbin şagirdi Zəhra Allahverdiyeva, 164 nömrəli məktəbin şagirdi Nəzrin Cəfərova, 19 nömrəli məktəbin şagirdi Sabir Ağamalı, 5 nömrəli məktəbin şagirdi Xədicə Mustafazadə həvəsləndirici yeri tutaraq sertifikatla təltif olunublar.

Sonda I, II, III yerin qaliblərinə diplom və hədiyyələr təqdim edilib.