“Birinci ixtisas qrupu üzrə riyaziyyat-kimya alt qrupunda 9199 dövlət sifarişli yer ayrılıb. RK alt qrupunda bu il 600 baldan yuxarı nəticə göstərənlərin sayı keçən illə müqayisədə bir qədər azdır. Yəni 600 baldan yuxarı nəticə göstərənlər üçün vəziyyət ciddi dəyişməyib”.

“Azərbayan müəllimi” xəbər verir ki, bu sözləri Dövlət İmtahan Mərkəzinin sədri Məleykə Abbaszadə abituriyentlərə videomüraciət zamanı deyib. 

O bildirib ki, keçən illə bu il arasında qeyd edilən ballar üzrə təxminən 10 ballıq azalma ola bilər: “Bu necə ifadə olunur? Məsələn, keçən il müəyyən ixtisasın keçid balı 650 idisə, bu il həmin ixtisas üçün keçid balı 640-639 ola bilər. 600-500 bal arasında nəticə göstərənlərin sayını keçən ilin statistikası ilə müqayisə etdikdə görürük ki, keçid balları təxminən 20 bal aşağı düşə bilər. Bu o deməkdir ki, bu il 500 bal və yuxarı toplayan, keçən il isə 510-520 balla keçid əldə edən ixtisaslara da qəbul olmaq şansları arta bilər. Beləcə, onların imkanları daha da genişlənir”.

Sədr əlavə edib ki, 500 baldan 400 bala qədər intervalda isə vəziyyət yenə də keçən il ilə müqayisədə təxminən 10 ballıq fərqlə davam edir:  “Yəni keçid ballarında təxminən 10 bal azalma ola bilər. 400-300 bal toplayanlar üçün isə müsabiqə vəziyyəti təxminən eyni olacaq”.