Kənd məktəbləri çox vaxt səssiz hekayələr yazır. Bu hekayələr qış səhərləri, tozlu dəhlizlər, səbirli müəllimlər və gecə lampası altında kitaba baxan şagirdlərlə başlayır. 

"Azərbaycan müəllimi" qəzeti olaraq, məhz belə bir təhsil ocağının –  builki 11-ci sinif üzrə buraxılış imtahanında Zərdabın ən yüksək nəticə göstərən İ.Nəsimi adına Yarməmmədbağı kənd tam orta məktəbinin uğur salnaməsinə nəzər salmaq üçün yola çıxdıq. Məqsədimiz yalnız rəqəmlərin arxasındakı insan hekayələrini üzə çıxarmaq deyil, həm də müəllim əməyi, valideyn dəstəyi və idarəetmənin birgə uğur modelini cəmiyyətə təqdim etmək idi.

Bu təhsil müəssisəsi haqqında danışarkən yalnız bir kənd məktəbindən deyil, təhsildə milli ruhun yaşadıldığı bir ocaqdan bəhs edirik. Elmə, təhsilə xidmət düşüncəsi bu məktəbdə kağız üzərində yox, gündəlik həyatda, sinif otaqlarında, müəllim masasının arxasında və şagird dəftərlərində öz əksini tapır.

Tarixi ənənəyə söykənən təhsil ocağı

Yarməmmədbağı kənd tam orta məktəbi 1972-ci ildən böyük Azərbaycan şairi İmadəddin Nəsiminin adını daşıyır. 2005-ci ildə istifadəyə verilən 264 yerlik yeni məktəb binası təhsil mühitində yeni mərhələnin başlanğıcı olub. Məktəb təkcə şəraiti ilə fərqlənmir, o, təhsil keyfiyyəti ilə də bölgədə xüsusi nüfuza malikdir.

“Hər şagirdin fərdi potensialını üzə çıxarmağa çalışırıq”

Məktəbin direktoru Sərmayə Süleymanova bildirir ki, məktəbin nəticələri birgə zəhmətin bəhrəsidir: “Biz müəllim, valideyn və şagird üçlüyünün ahəngli əməkdaşlığına inanırıq. Kurikulumun imkanlarından maksimum istifadə edərək hər şagirdin fərdi potensialını üzə çıxarmağa çalışırıq. Hər nailiyyətin arxasında əmək, məsuliyyət və inam dayanır”.

“Ədəbiyyat dərslərində yalnız şeirin əzbərlənməsi yox, hiss edilməsi əsasdır”

Yüksək nəticələr göstərmiş müəllimlərlə də görüşdük. Onlar tədris metodikaları, kurikulum sistemi və şagirdlərə yanaşmalar barədə danışdılar.

Riyaziyyat müəllimləri Polad Aslanov və Şövqi Ramazanov, Azərbaycan dili və ədəbiyyat müəllimləri Turanə İsmayılova və Fəzli Musayev, ibtidai sinif müəllimi Aliyə Məmmədova sertifikasiya imtahanlarında fərqlənməklə yanaşı, sinif otağında da fərqli yanaşmaları ilə seçilirlər.

Polad müəllim deyir: “Hər şagird fərqli yanaşma tələb edir. Biz burada sadəcə bilik vermirik, onların inamını və gələcəyə baxışlarını formalaşdırırıq”.

Fəzli müəllim isə hesab edir ki, ədəbiyyat dərslərində yalnız şeirin əzbərlənməsi yox, hiss edilməsi əsasdır. Hiss edən şagird düşünür və dəyərləndirir.

Şagirdlər danışır: “Özümə güvənməyi bu məktəbdə öyrəndim”

Yüksək nəticə əldə etmiş şagirdlərin baxışları sübut edir ki, bu məktəbdə təhsil həm öyrənmək, həm də düşünməkdir.

11-ci sinif şagirdi olan Fəridə Aslanova builki buraxılış imtahanında rayon üzrə ən yüksək nəticə göstərən məktəblidir. İmtahanda 295.6 bal toplayan Fəridə deyir: “Hər günüm planlı keçir. Müəllimlərlə interaktiv dərslərimiz olur. Oxumağa olan motivasiyamı ailəm və müəllimlərim dəstəkləyir. Özümə güvənməyi bu məktəbdə öyrəndim”.

IX sinif şagirdi Həcər Xəlilzadə isə belə düşünür: “Uğur zəhmət və səbrin birliyidir. Bəzən yorulsam da, məqsədimi xatırlayıb davam edirəm”.

XI sinif şagirdi Nofəl Xəlilov artıq bir kitab müəllifidir: “Yazmaq mənim üçün iç dünyamı ifadə etməkdir. “Sevgimiz bir cümlədir” adlı kitabım  müəllimlərimə və məktəbimə bir təşəkkürdür”.

Məktəbin qızıl nişanlı məzunu Cavahir Əmrahova isə uğurlarını belə izah edir: “ Uğurumun arxasında müəllimlərin mənə olan inamı və dərsdən sonra belə göstərdikləri diqqət dayanır. Hər uğurlu nəticənin arxasında görünməyən bir zəhmət dayanır – Yarməmmədbağı məktəbi isə bu zəhmətin məkanıdır”.

Rayonun ən yüksək göstəriciləri arasında – 205 bal

Məktəbdə nailiyyətlər sadəcə tarixə yazılmır. Onlar bir-birinə arxalanaraq davam edən silsilə yaradır.

2016-2017-ci tədris ilində Cavahir Əmrahova və Aytən Şirinova Təhsil Nazirliyinin qızıl nişanına layiq görülüblər. 2019-cu ildə Tavad Xəlilova “Əlaçı” televiziya yarışmasının qalibi olub.

2024-cü ildə Aysu Fərhadlı Respublika Fənn Müsabiqəsində təbiət fənni üzrə ölkə birincisi olaraq qızıl medal qazanıb.

Eyni ildə məktəbin intellektual komandası “Bir kərə yüksələn bayraq” yarışında qalib gəlib.

2025-ci ildə XI sinif buraxılış imtahanında 16 nəfərdən 10-u 200-dən yüksək bal toplayıb. Məktəbin orta balı 205-dir ki, bu da rayon üzrə ən yüksək göstəricilər sırasındadır. IX sinif şagirdləri Həcər Xəlilzadə və Ümid Hacıyev fərqlənmə attestatına layiq görülüblər.

X sinif şagirdi Fatma Məhərrəmli isə bu yaxınlarda "Qərbi Azərbaycana Qayıdış" olimpiadasının rayon mərhələsində uğur qazanaraq yarımfinal mərhələsinə vəsiqə qazanıb. 

Uğur yalnız imtahan balı ilə deyil, şeir, ideya və ya beynəlxalq uğurla da ölçülür.

IV sinif şagirdləri “Kings” Beynəlxalq Riyaziyyat Olimpiadasında 2 qızıl və 1 gümüş medal qazanıblar.

Uğurların kökü – ailə və məktəb birliyi

Uğur heç vaxt təkbaşına qazanılmır. Bu məktəbdə valideynlər də təhsil prosesinin fəal iştirakçılarıdır. Tədbir və layihələrdə onların iştirakı həm fiziki, həm də mənəvi dəstək şəklindədir.

Azərbaycan dili və ədəbiyyat müəllimi Türanə İsmayılova deyir: “Valideyn evdə “Oxu, sən bacararsan” deyirsə, biz ondan artıq nəticə gözləyə bilərik”.

Valideyn Günay Əliyeva isə söyləyir: “Məktəb ailəmizin bir parçasıdır. Biz birlikdə həm öyrədirik, həm də öyrənirik”.

Yarməmmədbağı məktəbi bu gün təkcə bir kənd məktəbi deyil. Bu məktəb məqsədyönlü pedaqoji yanaşmanın, dayanıqlı idarəetmənin, ailə-məktəb əməkdaşlığının və inamla qurulan gələcəyin rəmzidir. Bu məktəbdə yazılan uğur hekayəsi davam edir. Hər yeni tədris ili bu kitabın növbəti fəslidir – daha parlaq, daha ümidverici.

Yarməmmədbağı məktəbi göstərir ki, istək və birlik olduqda kənd də mərkəz ola bilər. Və bu mərkəz gələcəyin yolunu işıqlandıra bilər.