Lənkəran Dövlət Universitetində (LDU) Azərbaycan xalqının XX əsrdə yaşadığı ən faciəli tarixlərdən biri olan Xocalı soyqırımının 33-cü ildönümünə həsr olunmuş “Xocalı soyqırımı – qan yaddaşımız” adlı tədbir keçirilib.

Universitetdən “Azərbaycan müəllimi”nə bildirilib ki, tədbir Xocalı faciəsinin günahsız qurbanlarının və canlarını Azərbaycanın ərazi bütövlüyü yolunda qurban vermiş Vətən müharibəsi şəhidlərinin xatirəsinin bir dəqiqəlik sükutla anılması ilə başlanıb.

Sonra Azərbaycan Respublikasının Dövlət Himni səslənib.

LDU-nun Tarix və onun tədrisi metodikası kafedrasının müdiri dos. Kamal Mahmudov “Xocalı soyqırımı xalqımızın qan yaddaşıdır”,  Azərbaycan dili və ədəbiyyatı kafedrasının müdiri dos.Qədim Rufullayev “Xocalı qan yaddaşımızda yaşayan faciə kimi”, LDU TGT-nin sədri Sara İbadzadə “Xocalı soyqırımı: Gənclərin yaddaşına həkk olunmuş xatirə” mövzusunda məruzə ediblər.

Məruzələrdə Azərbaycan tarixinin ən ağrılı və faciəli səhifəsi olan Xocalı soyqırımının təkcə xalqımıza yox, bütün bəşəriyyətə qarşı törədilən qəddar cinayətlər siyahısında yer aldığı bildirilib, bu faciə əsrlər boyu ermənilərin xalqımıza qarşı törətdikləri soyqırımıların daha bir dəhşətli təzahürü kimi qiymətləndirilib. Xocalı faciəsi baş verən dövrdə Azərbaycanda və dünyada yaşanan hadisələr, faciəni doğuran səbəblər və onun ağrılı nəticələri, ibrət dərsləri, Ulu Öndər Heydər Əliyevin Xocalı dəhşətlərinin dünyaya çatdırılması istiqamətində çoxşaxəli fəaliyyəti və s. barədə ətraflı söz açılıb. Bildirilib ki, Heydər Əliyevin 1994-cü il fevralın 24-də imzaladığı fərmanla 26 fevral xalqımıza qarşı törədilən soyqırımı aktı kimi qeyd edilməyə, lokal məkandan çıxaraq beynəlxalq səviyyədə tanınmağa başlanıb. 

Azərbaycan Respublikasının Prezidenti İlham Əliyevin “Xocalı xalqımızın sağalmaz dərdidir, xalqımıza qarşı törədilən soyqırımıdır” fikrini dəstəkləyən məruzəçilər erməni qəsbkarlarının tarix boyu xalqımıza olmazın faciələr yaşatdığını deyərək gəncləri unutqan olmamağa, tarixin ibrət dərslərindən lazımi nəticə çıxarmağa çağırıblar.

Bu şəhərdə Azərbaycan Bayrağının dalğalanması Xocalı faciəsi qurbanlarının qanının yerdə qalmadığını bir daha nümayiş etdirir. Ali Baş Komandan İlham Əliyevin “Biz Xocalı soyqırımı qurbanlarının qisasını döyüş meydanında aldıq. Biz heç vaxt imkan verə bilmərik ki, bizim bölgədə erməni faşizmi baş qaldırsın” sözləri anım tədbirinin məntiqi yekunu kimi səslənib.

Anım tədbirində Xocalı faciəsindən bəhs edən videorolik nümayiş etdirilib.  

Qeyd edək ki, bu gün Lənkəran Dövlət Universitetində ilk dərslərdə faciə qurbanlarının xatirəsi ehtiramla yad edilib, Xocalı şəhidlərinin xatirəsinə ucaldılmış xatirə abidə kompleksi səhər saatlarında professor-müəllim, tələbə və işçi heyəti tərəfindən ziyarət olunub.