Bu gün keçirilən sertifikatlaşdırma imtahanında Lənkəran-Astara bölgəsinin iki müəllimi maksimum (60 bal) nəticə göstərib.

"Azərbaycan müəllimi" xəbər verir ki, onlar Masallı şəhəri 2 nömrəli tam orta məktəbin coğrafiya müəllimi Azad Mustafayev və Cəlilabad şəhəri Şah İsmayıl Xətai adına 4 nömrəli orta məktəbin coğrafiya müəllimi Rəvan İmanovdur. 

“Azərbaycan müəllimi” hər iki müəllimlə həmsöhbət olaraq onların imtahan təəssüratlarını öyrənib.

Cəlilabad rayonunun olan Rəvan İmanov Azərbaycan Dövlət Pedaqoji Universitetinin Tarix-Coğrafiya fakültəsində təhsil alıb. Müəllimlik fəaliyyəti ilə yanaşı, o, Vətən müharibəsində də böyük şücaət göstərib, “Füzulinin azad olunmasına görə”, “Cəbrayılın azad olunmasına görə”, “Şuşanın azad olunmasına görə” və “Vətən müharibəsi iştirakçısı” medalları ilə təltif olunub. 2020-ci ildə MİQ imtahanlarında mümkün 60 baldan 56 bal toplayaraq Cəlilabad şəhəri Şah İsmayıl Xətai adına 4 nömrəli tam orta məktəbdə coğrafiya müəllimi kimi pedaqoji fəaliyyətə başlayan Rəvan müəllim bugünkü imtahanla bağlı təəssüratlarını bölüşüb: “İmtahan tam şəffaf və yaxşı təşkil olunmuşdu. Öz üzərində işləyən müəllimlər üçün çətinlik yox idi. Suallar müxtəlif səviyyələrdə idi. Sertifikatlaşdırma prosesinin faydası böyükdür. Sertifikatlaşdırma müəllimləri daim axtarışda olmağa, yeni biliklər əldə etməyə sövq edir”.

“Bu imtahanların hər zaman tərəfdarı olmuşam”

Azad Mustafayev isə pedaqoji fəaliyyətə 2012-2013-cü tədris ilində Cəlilabad rayonunun Kazımabad kənd tam orta məktəbində başlayıb. 2020-2021-ci tədris ilində müəllimlərin iş yerinin dəyişdirilməsi müsabiqəsində uğur qazanaraq Masallı şəhəri Nəriman Nərimanov adına 2 nömrəli tam orta məktəbində fəaliyyətini davam etdirib. Hazırda bu məktəbdə coğrafiya fənnini tədris edən müəllim həm də 2024-cü ildə keçirilən müəllimlərin işə qəbul müsabiqəsində iştirak edərək 83.25 balla Masallı rayon M.Hacıyev adına Ərəb kənd ümumi orta məktəbində ikinci iş yerinə qəbul olunub. Sertifikatlaşdırma imtahanı barədə fikirlərini bölüşən Azad Mustafayev imtahan prosesindən razı qaldığını bildirib: “İmtahan çox yaxşı keçdi. Suallardan razı qaldım. Hər səviyyəyə uyğun suallar var idi. İmtahana tam müstəqil şəkildə özüm hazırlaşdım. Düşünürəm ki, məsuliyyəti və öz üzərində ciddi şəkildə çalışan hər bir müəllim bu uğuru əldə edə bilər”.

Azad müəllim sertifikatlaşdırma imtahanlarının vacibliyini də vurğulayıb: “Bu imtahanların hər zaman tərəfdarı olmuşam. Çünki bu proses müəllimlərə maddi vəziyyətlərini yaxşılaşdırmağa imkan verməklə yanaşı, eyni zamanda onların öz bilik səviyyələrini də qiymətləndirməyə imkan verir. Sertifikatlaşdırma müəllimə zəif və güclü tərəflərini görməyi və üzərində işləməyi öyrədir. Bu baxımdan faydalı prosesdir”.

Qeyd edək ki, bu gün Lənkəran-Astara Regional Təhsil İdarəsi üzrə Astara, Masallı və Lənkəranda yerləşən 3 mərkəzdə 415 nəfər müəllimin test imtahanı mərhələsinə cəlb olunması nəzərdə tutulub.  Bugünkü sertifikatlaşdırma prosesində coğrafiya, ibtidai sinif müəllimləri iştirak edirlər.