21 yanvar tarixində Mingəçevir Dövlət Universitetinin (MDU) Gənc Alimlər Şurasının növbəti iclası keçirilib. 

Universitetdən “Azərbaycan müəllimi”nə bildirilib ki, iclasda Şuranın bütün üzvləri iştirak ediblər. Gənc Alimlər Şurasının sədri Aygün Qədirova iclasın başlanğıcında gündəlikdəki məsələləri təqdim edərək, iştirakçılara iclasın məqsədini açıqlayıb.

İclasın əsas gündəlik məsələlərindən biri, universitetin elmi və innovativ fəaliyyətinin gücləndirilməsi ilə bağlı olub. Elm və innovasiyalar şöbəsinin müdiri Vüqar Mustafayev MDU-nun yeni dövrün universitetinə çevrilməsində Gənc Alimlər Şurası üzərinə düşən məsuliyyətdən danışaraq bu istiqamətdə səylərin daha da gücləndirilməsinin vacibliyini diqqətə çatdırıb.

Vüqar Mustafayev çıxış edərək, MDU-nun elmi potensialının inkişaf etdirilməsi və universitetin gələcəkdə elm sahəsindəki müsbət nüfuzunu daha da artırması üçün Gənc Alimlər Şurasının üzərinə düşən mühüm məsuliyyətlərə diqqət çəkib. O, Şuranın fəaliyyətinin universitetin müasir tələblərə uyğun şəkildə inkişafına mühüm töhfə verəcəyini qeyd edib və bu istiqamətdə səylərin gücləndirilməsinin vacibliyini vurğulayıb.

İclasda həmçinin universitetin gənc alimləri və tələbələrinin elmi fəaliyyətlərini stimullaşdırmaq məqsədilə bir sıra yeni layihələr və təkliflər irəli sürülüb. Şura üzvləri arasında keçirilən müzakirələrdə, müxtəlif elmi sahələrdəki aktual məsələlər, elmi-tədqiqatların inkişafı və elmi nəticələrin cəmiyyətə təqdim edilməsi mövzuları geniş şəkildə müzakirə edilib. Müzakirələr zamanı müxtəlif təkliflər səsləndirilib və bu təkliflər universitetin elmi inkişafına dəstək verilməsi məqsədilə şuranın fəaliyyətində nəzərə alınacağı bildirilib.

İclasın yekununda Gənc Alimlər Şurası üzvlərinin qarşıdakı dövr üçün planlarını və fəaliyyət istiqamətlərini müzakirə edərək, konkret addımlar atılacağı qərarını alıblar.