İyunun 10-da Naxçıvan Muxtar Respublikasında Azərbaycan Respublikası Prezidentinin Səlahiyyətli Nümayəndəliyi, Naxçıvan Muxtar Respublikası Nazirlər Kabineti, Naxçıvan Şəhər İcra Hakimiyyəti  və Naxçıvan Dövlət Universitetinin təşkilatçılığı ilə "Karyera sərgisi 2" açılıb.

"Azərbaycan müəllimi" xəbər verir ki, Naxçıvan şəhərinin "Böyük Bağ" adlı ərazisində təşkil olunan sərgi iki gün davam edəcək. 

Tədbirdə çıxış edən Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəfli bildirib ki, Naxçıvanda keçirilən digər mühüm tədbirlər kimi, karyera sərgisinin də təşkili artıq ənənə halını alıb. Səlahiyyətli nümayəndə qeyd edib ki, Muxtar Respublikada həyata keçirilən islahatlar iqtisadiyyatı, eləcə də digər sahələri əhatə edir. 
“Karyera qurmaq uzun və çətin bir yolun başlanğıcıdır. Bu yol heç də hamar deyil. Hər bir insanın karyera yolunda qarşısına böyük çətinliklər çıxır. Bu çətinliklərin öhdəsindən yalnız əzmlə çalışmaqla gəlmək olar”, –  deyən Fuad Nəcəfli bildirib ki, artıq süni intellekt həyatımıza daxil olub və bir çox sahələrdə insanları əvəz etməyə qadirdir. Əgər bu yeniliklər “yaşıl enerji”, kənd təsərrüfatı, iqtisadiyyat, nəqliyyat infrastrukturu və turizm kimi sahələrdə tətbiq edilsə, böyük uğurlar əldə olunacaq.

Naxçıvan Dövlət Universitetinin rektoru Elbrus İsayev bildirib ki, artıq ikinci dəfə keçirilən karyera sərgisinin əsas məqsədi tələbə və məzunları əmək bazarındakı imkanları daha yaxından tanıtmaq, işəgötürənlərlə birbaşa ünsiyyət qurmaq imkanı yaratmaqdır. Sərgi çərçivəsində məzun və tələbələr üçün paytaxtdan dəvət olunmuş peşəkar mütəxəssislər tərəfindən müxtəlif mövzularda təlimlər keçiriləcək. 

Sərgidə 40-dan artıq müəssisə və təşkilat iştirak edir. Ziyarətçilər şirkət nümayəndələri ilə görüşmək, CV-lərini təqdim etmək, təcrübə və iş imkanları haqqında birbaşa məlumat almaq imkanı əldə edirlər.

İki gün ərzində sərgiyə 5000-dən çox tələbə və məzun olmaqla, 7000 ziyarətçinin qatılması gözlənilir.