Bakı şəhəri Maştağa qəsəbəsinin Savalan yaşayış massivində 349 nömrəli uşaq bağçası istifadəyə verilib.

Bakı Şəhəri üzrə Təhsil İdarəsindən “Azərbaycan müəllimi”nə bildirilib ki, açılış tədbirində Məktəbəqədər və Ümumi Təhsil üzrə Dövlət Agentliyinin (MÜTDA) Məktəbəqədər təhsilin təşkili şöbəsinin müdiri İlahə Rəsulova, Bakı Şəhəri üzrə Təhsil İdarəsinin müdir müavini Xəyalə Əhmədzadə, İdarənin nümayəndələri, müəllimlər və valideynlər iştirak ediblər.

Tədbirdə çıxış edən MÜTDA-nın Məktəbəqədər təhsilin təşkili şöbəsinin müdiri İ.Rəsulova uşaq bağçasının fəaliyyətinə uğurlar arzulayıb və ölkəmizdə məktəbəqədər təhsilin inkişafına göstərilən dövlət qayğısından söz açıb. Şöbə müdiri uşaq bağçalarının işinin yüksək tələblər səviyyəsində təşkili istiqamətində atılan addımlara diqqət çəkib və məktəbəqədər təhsil müəssisələrinin yenidən qurulması, müasir uşaq bağçalarının inşası sahəsindəki fəaliyyətin daha da genişləndirildiyini bildirib.  

Sonda qonaqlar bağçada yaradılmış şəraitlə tanış olub, qruplara baxış keçiriblər.

Qeyd edək ki, yeni istifadəyə verilən 100 yerlik uşaq bağçasında hazırda 75 uşağın təlim tərbiyəsi ilə 8 pedaqoji işçi məşğul olur.

Onu da qeyd edək ki, 2024-cü ildə paytaxt üzrə yeni tikilmiş və əsaslı təmir olunmuş 8 məktəbəqədər təhsil müəssisəsi istifadəyə verilib.