Qarabağ Regional Təhsil İdarəsinin tabeliyindəki orta məktəblərin şagirdləri üçün “Yay məktəbi” təşkil edilib.

"Azərbaycan müəllimi" xəbər verir ki, Şuşadan 30, Füzulidən isə 35 şagird bu proqrama cəlb olunub.

Bu fəaliyyət Şuşa şəhəri 1 nömrəli tam orta və Füzuli şəhəri Mirzə Uluqbəy adına 1 nömrəli tam orta məktəbdə təşkil olunub.

“Yay məktəbi”nin məqsədi şagirdlərin yay tətilini sadəcə istirahət dövrü kimi deyil, həm də inkişaf mərhələsi kimi dəyərləndirməkdir. Onlar bununla həm də biliklərini möhkəmləndirir, yeni bacarıqlar qazanırlar, eyni zamanda, yaradıcılıq potensialları üzə çıxarılır. 

“Yay məktəbi” həm akademik mövzuların təkrarı, həm də sosial və emosional bacarıqların inkişafı üçün əvəzsiz platformadır.

Burada əsas fənlər üzrə möhkəmləndirici dərslər keçirilir, layihə əsaslı öyrənmə fəaliyyətləri, idman tədbirləri, yaradıcılıq emalatxanaları, incəsənət, musiqi və teatr məşğələləri təşkil edilir.

Şuşa şəhər 1 nömrəli tam orta məktəbdən bildirilib ki, məktəbin nəzdində STEAM Mərkəzi yerləşir. Şagirdlər tətil müddətində mərkəzdəki “Cubaro”, “TinkerCad” və “Robotics” kimi müxtəlif təlimlərdə uğurla iştirak edərək sertifikatlar əldə ediblər. “Yay məktəbi” çərçivəsində həmçinin şahmat, müxtəlif idman yarışları, mətbəx bacarıqları, ekskursiyalar və Cıdır düzündə dərslər təşkil olunub.

Mirzə Uluqbəy adına 1 nömrəli tam orta məktəbdən verilən məlumata əsasən, “Yay məktəbi”nin təşkili ilk olaraq şagird və valideynlər arasında onlayn sorğunun keçirilməsi ilə  başlayıb. İştirakçıların arzuları, gözləntiləri və maraqları nəzərə alınaraq 35 nəfərlik könüllü qrup formalaşdırılıb. Hər gün 15 dəqiqəlik səhər məşqləri, müxtəlif oyun və yarışlar keçirilir. Günün sonunda isə ən aktiv, əməksevər və yaradıcı şagirdlər "Günün ulduzu" olaraq qiymətləndirilir. Məktəbin balaca üzvləri üçün isə nağıl və film saatları təyin edilir.