2024-cü ilin “Yaşıl dünya naminə həmrəylik ili” elan edilməsi ilə bağlı Tədbirlər Planı çərçivəsində Şirvan-Salyan Regional Təhsil İdarəsinin tabeliyindəki ümumi təhsil müəssisələrində “yaşıl siniflər” və ətraf mühit guşələri yaradılır. 

İdarədən "Azərbaycan müəllimi"nin sorğusuna cavab olaraq bildirilib ki, bu guşələr vasitəsilə şagirdlər ətraf mühitin qorunmasının əhəmiyyəti haqqında maarifləndirilir. 

Tədbirlər planı çərçivəsində keçirilən ağacəkmə aksiyalarında şagirdlər aktiv şəkildə iştirak edərək yaşadıqları ərazidə daha çox yaşıllıq sahələrinin yaradılmasına töhfə verirlər. Eyni zamanda, məktəblərdə tullantıların çeşidlənməsi və təkrar emalı təşviq olunur. Müəssisələrdə qutular qurulur, şagirdlərə plastik, kağız və digər tullantıların necə ayrılacağı öyrədilir. 

“Yaşıl dünya naminə həmrəylik ili” çərçivəsində şagirdlər arasında ekoloji mövzuda rəsm, inşa yarışmaları təşkil olunur. Bu yarışmalar vasitəsilə şagirdlər öz ekoloji biliklərini  ifadə edir və fikirlərini sinif yoldaşları ilə paylaşırlar.

İdarənin tabeliyindəki təhsil müəssisələrində COP29 (İqlim Dəyişikliyi üzrə Birləşmiş Millətlər Təşkilatının Tərəflərinin Konfransı) çərçivəsində şagirdlərə iqlim dəyişikliyinin səbəbləri, təsirləri və onun qarşısını almaq üçün fərdi və qlobal səviyyədə nələrin edilə biləcəyinə dair dərslər, təqdimatlar keçirilir. 

“Məktəblərdə ekologiya ayı” çərçivəsində xüsusi dərslər təşkil edilib. Bu müddətdə şagirdlərə iqlim dəyişikliyi, ətraf mühitin qorunması və təbii resurslardan səmərəli istifadə mövzularında məlumatlar verilib. Dərslərin məqsədi şagirdlərin ekoloji biliklərini artırmaq və onları ətraf mühitin qorunmasına daha məsuliyyətli yanaşmağa təşviq etmək olub.

Sadalanan bütün tədbirlər şagirdlərə təbiəti qorumaq, resurslara hörmətlə yanaşmaq və ekoloji cəhətdən məsuliyyətli vətəndaşlar kimi formalaşmaq üçün əhəmiyyətli bilik və vərdişlər qazandırır.