2024/2025-ci tədris ilində Azərbaycan Dövlət Neft və Sənaye Universiteti (ADNSU) ilə Vorvik Universiteti (WMG at the University of Warwick) arasında “Bərpa olunan enerji mənbələri” ixtisası üzrə magistratura səviyyəsində həyata keçirilən beynəlxalq ikili diplom proqramının I kurs tələbələri 3–24 avqust tarixlərində İngiltərənin Koventri şəhərində yerləşən Vorvik Universitetində təşkil olunmuş “Yay məktəbi”ndə iştirak edirlər və dərslərə artıq start verilib.

ADNSU-dan “Azərbaycan müəllimi”nə bildirilib ki, 21 gün davam edəcək proqram zamanı tələbələrə Vorvik Universitetinin “WMG” fakültəsinin professor-müəllim heyəti tərəfindən "Energy Systems Integration" və "UK Renewable Energy Sector" fənn blokları tədris olunacaq. Eyni zamanda, “Yay məktəbi” çərçivəsində tələbələr Böyük Britaniyada fəaliyyət göstərən günəş paneli tarlaları, külək turbinlərinin yerləşdiyi istismar zonaları və sahə ilə əlaqəli aparıcı şirkətlərə səfərlər edərək real sektorda mövcud tendensiyalarla tanış olacaqlar. Bu təcrübə onlara yeni çağırışlar və perspektivlərlə bağlı geniş baxış bucağı qazandıracaq.

Qeyd edək ki, proqramın tədris planına əsasən, “Yay məktəbi”ndə iştirak edən hər bir tələbə “Energy Systems Integration” və “UK Renewable Energy Sector” fənləri üzrə həm nəzəri, həm də praktiki dərslərdə fiziki iştirak etməklə Azərbaycan təhsil sisteminə uyğun olaraq 15 ECTS (European Credit Transfer System), yaxud Böyük Britaniya təhsil sisteminə uyğun 30 CATS (Credit Accumulation and Transfer Scheme) krediti toplamalıdır. Bu kreditlərin qazanılması tələbənin magistr dərəcəsinə və dövlət nümunəli diplomla təltif olunmasına dair əsas şərtlərdən biridir.

Onu da qeyd edək ki, Yay məktəbində iştirak edən tələbələrin viza, səyahət, yaşayış və qidalanma da daxil olmaqla bütün xərcləri ADNSU tərəfindən qarşılanır.

Sözügedən proqram çərçivəsində beynəlxalq səviyyəli professor-müəllim heyətinin iştirakı tələbələrin bərpa olunan enerji sektorunda rəqabətqabiliyyətli bilik və bacarıqlara yiyələnməsinə, həmçinin Azərbaycanın karbonsuz və təmiz enerji keçidində aktiv rol almalarına mühüm töhfə verir.

ADNSU ilə Vorvik Universiteti arasında bu əməkdaşlıq ölkəmizdə bərpa olunan enerji texnologiyaları sahəsində ixtisaslaşmış milli mütəxəssislərin hazırlanması üçün dayanıqlı və yüksək keyfiyyətli tədris mühitinin formalaşdırılmasına xidmət edir.