Xəbər verdiyimiz kimi, Dövlət Proqramı çərçivəsində həyata keçirilən beynəlxalq ikili diplom proqramlarının sayı artırılıb. Prezident İlham Əliyev ötən ay ali təhsil sisteminin beynəlxalq rəqabətliliyinin artırılması məqsədilə əlavə tədbirlər haqqında sərəncam imzalayıb.

Sərəncama əsasən, ali təhsil sahəsində tətbiq edilən ikili diplom proqramlarının sayı “Azərbaycan Respublikasının 2022–2026-cı illərdə sosial-iqtisadi inkişaf Strategiyası”na uyğun olaraq 6-dan 8-ə çatdırılıb və onların icrası 2030-cu ilədək təmin ediləcək.

“Azərbaycan müəllimi” Azərbaycan Dövlət Pedaqoji Universiteti (ADPU) ilə Corc Vaşinqton Universiteti (CVU) arasında icra edilən ikili diplom proqramının baş direktoru Tofiq Əhmədovla həmsöhbət olub.

Tofiq Əhmədov vurğulayıb ki, ikili diplom proqramları tələbələrin akademik bilik və bacarıqlarının inkişafına mühüm töhfə verir. Onun sözlərinə görə, bu uğurun əsas səbəbi yerli universitetlərin dünya səviyyəli, nüfuzlu ali təhsil müəssisələri ilə əməkdaşlıq etməsidir:

“Əsas üstünlüklərdən biri odur ki, tələbələr yalnız dar ixtisas sahələrində deyil, iqtisadiyyat və cəmiyyətin ehtiyaclarına uyğun geniş profilli sahələrdə təhsil alırlar. Bəzi proqramlar çərçivəsində tələbələrin xarici universitetlərə səfəri onların yeni bilik və bacarıqlar qazanmasına şərait yaradır”.

O əlavə edib ki, bu proqramlar tələbələrə Azərbaycanın sosial-iqtisadi mühiti ilə sıx əlaqədə qalmağa imkan verir. Bu isə onlara problemləri daha məqsədyönlü və rasional həll etmək bacarığını öyrədir:
“Nəticə etibarilə, ikili diplom proqramlarının genişləndirilməsi Azərbaycan təhsil sisteminin inkişafına, cəmiyyətin tərəqqisinə və ölkə iqtisadiyyatının güclənməsinə ciddi töhfələr verə bilər”.

Həmsöhbətimiz bildirib ki, ADPU hazırda CVU-nun Təhsil və insan inkişafı fakültəsi ilə əməkdaşlıq edir:
“Bu nüfuzlu universitetin 200 ildən artıq təcrübəsi və ən müasir yanaşmaları tələbələrin akademik inkişafına böyük təsir göstərir. Tələbələr müxtəlif ölkələrin təhsil problemlərini və onların həlli yollarını öyrənərək, geniş elmi bilik və tədqiqat bacarıqları qazanırlar”.

Tofiq Əhmədov həmçinin proqramın müəllimlərin tədris metodlarını və beynəlxalq təcrübələrini zənginləşdirməsindəki rolunu qeyd edib:

“Tərəfdaş universitetlərdə həyata keçirilən səfərlər müəllimlərə yeni bilik və bacarıqlar qazanmaq imkanı verir. Mübadilə proqramları çərçivəsində təklif olunan təhsil inkişaf proqramları beynəlxalq təcrübələrin Azərbaycanda tətbiqinə şərait yaradır”.

Baş direktor əlavə edib ki, ikili diplom proqramları tələbələrin əmək bazarında rəqabət qabiliyyətini əhəmiyyətli dərəcədə artırır:

“ADPU ilə CVU  arasında ikili diplom proqramı üzrə dörd məzun buraxılışı olub və ümumilikdə 122 tələbə iştirak edib. Bu məzunlar dövlət qurumları, yerli və xarici təhsil müəssisələrində çalışaraq yüksək rəqabət qabiliyyətinə malik olduqlarını sübut edirlər. Onlar tədqiqat bacarığı, komandada işləmə, təqdimat və qərarvermə kimi mühüm kompetensiyalara sahibdirlər”.

O vurğulayıb ki, ikili diplom proqramları vasitəsilə tələbələr təkcə nəzəri bilik deyil, həm də müxtəlif ölkələrin təcrübəsi əsasında əldə edilmiş praktiki bacarıqları öyrənirlər:

“Bu, Azərbaycan təhsilinin beynəlxalq səviyyədə inkişafına və ölkəmizdə uğurlu təcrübələrin tətbiqinə imkan yaradır”.

Sonda Tofiq Əhmədov qeyd edib ki, ADPU və Corc Vaşinqton Universiteti arasında icra olunan ikili diplom proqramı ölkəmizdə böyük maraqla qarşılanır. Proqram idarəetmə və təhsil siyasəti sahəsində peşəkar kadrların hazırlanmasına xidmət edir. Hər il müraciətlərin sayı artmaqda, iştirakçıların dairəsi isə genişlənməkdədir.

“Ölkə rəhbərliyinin 2025–2030-cu illərdə ikili diplom proqramlarının sayının artırılması ali təhsil müəssisələrinin beynəlxalq əməkdaşlıq şəbəkəsini daha da genişləndirəcək, peşəkar kadrların hazırlanmasında dayanıqlı inkişafı təmin edəcək və ölkəmizin təhsil sisteminə mühüm təsir göstərəcək”.