Şəki-Zaqatala Regional Təhsil İdarəsinin tabeliyində fəaliyyət göstərən ümumi təhsil müəssisələrinin məzunları 2024–2025-ci tədris ilində həm buraxılış, həm də qəbul imtahanlarında parlaq nailiyyətlər əldə ediblər.

“Azərbaycan müəllimi” xəbər verir ki, Şəki rayonunda ən yüksək nəticəni Orta Zəyzid kənd Asim Kamil oğlu adına 1 nömrəli tam orta məktəbin məzunu Orxan Abdulsəmədli göstərib. O, hər iki imtahanda maksimum, ümumilikdə, 700 bal toplayaraq rayon birincisi adını qazanıb.

Qax rayonunun ən yaxşı nəticəsinə Çiçək Hümmətli imza atıb. N.Allahverdiyev adına 2 nömrəli məktəb-liseyin məzunu olan Çiçək 697 bal yığaraq rayon üzrə ən yüksək göstəricini əldə edib.

Balakən rayonunda uğurlu nəticəsi ilə seçilən Şahin Məmmədov olub. Amin Novruzov adına Humanitar və texniki fənlər təmayüllü liseyin məzunu 695 bal toplayaraq rayon liderinə çevrilib.

Qəbələ rayonunda birinciliyi Səmra Mahmudova qazanıb. Daşca kənd tam orta məktəbin məzunu olan Səmra 692 bal nəticə ilə rayon üzrə ən yüksək bal toplayan məzun olub.

Oğuz rayonunda ən yaxşı nəticəni Gülər Ənsərli göstərib. Nail İbrahimli adına 3 nömrəli məktəb-liseyin məzunu 683 bal yığaraq rayon birincisi olub.

Zaqatala rayonunda isə ən yüksək balı Xanzadə Həsənova toplayıb. Şıxəli Qurbanov adına 3 nömrəli tam orta məktəbin məzunu 678 bal göstəricisi ilə rayon üzrə ən yüksək nəticə nümayiş etdirib.