18 sentyabr ölkəmizdə Milli Musiqi Günü kimi qeyd olunur.

“Azərbaycan müəllimi” qəzetinin arxivindən böyük incəsənət xadimlərimizin müəllim və müəllimlik haqqındakı fikirlərini təqdim edirik:

"Müəllim, mənəvi ata, mənəvi anadır. Bu təyini xalq vermişdir. Ata, ana dedikdə, nəzərimizdə ülvi, müqəddəs və əziz bir şəxsiyyət canlanır. Müəllim də ata və ana kimi müqəddəsdir. Uşaqlar müəllimə böyük məhəbbət bəsləyirlər. Bu böyük məhəbbət tarixin sınaqlarından çıxmışdır.

Müəllim sözün hərfi mənasında böyük psixoloq səviyyəsinə çatmalıdır. Onun səbri, hövsələsi ana qədər olmalıdır. Müəllim uşaqların yaşına görə, onların daxili aləmlərini aybaay, ilbəil duymalı, hiss etməli və böyük qayğı ilə metodik araşdırmalar aparmalı, böyümə, əqlə, kamala dolma proseslərini izləməlidir".

Bülbül, 
SSRİ xalq artisti, müğənni
“Azərbaycan müəllimi” qəzeti, 14 noyabr 1960-cı il, №91           

*

“Gənc nəslimizin tərbiyəsində, hərtərəfli inkişafında müəllimlərimizin böyük rolunu göstərməyə söz tapa bilmirəm. Bədii dildə desək, onlar ḫəyatın geniş qoynuna atılmaq üçün gənc nəslə qanad verənlərdir! Heç kim doğma müəllimini unutmur, onu həmişə böyük sevgi ilə xatırlayır. Çünki müəllimlər də bizdə ata-ana kimi müqəddəs sayılırlar”.

Qara QARAYEV, 
SSRİ xalq artisti, Azərbaycan SSR Bəstəkarlar İttifaqının sədri
“Azərbaycan müəllimi” qəzeti, 14 noyabr 1960-cı il, №91

**

“İnsanda estetika onun mənəvi gözəlliyidir. Mənəvi gözəlliyi yaradan isə musiqi, ədəbiyyat və dildir. Bunlar bizim mənəvi həyatımızdır. Musiqinin açdığı gözəllik aləmi insan ruhuna, psixologiyasına dərindən təsir edir, onu nəcibləşdirir, ülviləşdirir, həyatdan zövq almağa, yaşamağa, yaratmağa ruhlandırır. Məhz buna görə də indi parta arxasında oturan vətənimizin gələcək qurucularına əsaslı musiqi tərbiyəsi verilməsi, onlarda musiqini duymaq və ondan zövq almaq qabiliyyəti formalaşdırılması pedaqoji kollektivlərin əsas işi olmalıdır. Müəllimlərimiz istər dərs prosesində, istərsə də sinifdənxaric və məktəbdənkənar tədbirlər vasitəsi ilə musiqinin açdığı gözəllik aləmi ilə şagirdləri daha yaxından tanış etməlidirlər”. 

Niyazi, 
SSRİ xalq artisti, dirijor, Sosialist Əməyi Qəhrəmanı
“Azərbaycan müəllimi” qəzeti, 30 Aprel 1970-ci il, №8