Yeni Zelandiya hökuməti orta məktəblərin dərs proqramını yeniləyərək şagirdləri sürətlə dəyişən iş dünyasına hazırlayır. 

“Azərbaycan müəllimi” xəbər verir ki, yenilənmiş proqramda texnologiya, süni intellekt (AI) və STEM fənləri xüsusi vurğulanır.

Təhsil naziri Erika Stanford bildirib ki, məqsəd məzunları ali təhsil, peşə hazırlığı və ya birbaşa iş həyatına çıxmağa hazırlamaq, onların bilik və bacarıqlarını gələcək karyera imkanları ilə əlaqələndirməkdir.

Yeni proqramda statistika və data elmi, elektronika və mexatronika, əlavə riyaziyyat kimi sahələr üzrə ixtisaslaşma imkanı yaradılır. Bu fənlər şagirdlərə analitik düşüncə, problem həll etmə və texnologiya yönümlü bacarıqlar qazandıracaq.

Süni intellektin artan roluna uyğun olaraq, AI savadı proqramın mərkəzi hissəsi kimi nəzərdə tutulub. Şagirdlər generativ süni intellektdən müxtəlif fənlərdə istifadə etməklə həm texnologiyanın imkanlarını, həm də etik tərəflərini öyrənəcəklər. Yeni proqramda rəqəmsal sistemlər, maşın öyrənməsi, kibertəhlükəsizlik və rəqəmsal etik kimi sahələrə də yer verilir.

Nazir həmçinin bildirib ki, 13-cü sinif üçün generativ süni intellekt üzrə ixtisas fənni də tətbiq oluna bilər, bu da şagirdlərə AI texnologiyalarının nəzəriyyəsi, tətbiqləri və gələcək imkanlarını dərindən öyrənməyə imkan verəcək.

Texnologiya yaradıcı və tətbiqi fənlərə də inteqrasiya olunur. Məsələn, yeni musiqi texnologiyası fənni şagirdlərə rəqəmsal innovasiya və incəsənət arasındakı əlaqələri araşdırmaq imkanı verəcək, elektronika və mühəndislik sahəsində kurslar isə peşəkar kontekstdə texnologiya tətbiqi təcrübəsi təmin edəcək.

Hökumət məktəblərə dərslərin mərhələli tətbiqi üçün peşəkar təlim, dərs resursları və rəhbərlik paketləri təqdim edəcək. Yeni fənlərin 2028-ci ildən etibarən mərhələli tətbiqi planlaşdırılır.

E.Stanford vurğulayıb ki, bu təşəbbüs şagirdlərin gələcək iş və təhsil imkanlarına uyğun bacarıq və özünəinam qazanmalarını təmin edəcək, Yeni Zelandiyanın qlobal rəqabətqabiliyyətini gücləndirəcək.