Böyük Britaniyanın Fizika İnstitutunun (Institute of Physics – IoP) apardığı təhlilə görə, İngiltərədə dövlət məktəblərinin dörddə biri yeni dərs ilinə ixtisaslı fizika müəllimi olmadan başlayacaq. Bu isə ümumilikdə 700 min şagirdin fənni mütəxəssis olmayan müəllimlərdən öyrənməsi deməkdir.

“Azərbaycan müəllimi” xəbər verir ki, tədqiqata əsasən, hazırda şagirdlərin 58 faizi fizikanı bu sahə üzrə ixtisas təhsili almamış müəllimlərdən öyrənir. Hesabatda qeyd olunur ki, ixtisaslı müəllimlərin çatışmazlığı nəticəsində hər il 12 min şagird “A” səviyyə fizika imtahanından kənarda qalır, 300-dən çox dövlət məktəbi isə heç bir məzunun fizikanı ali səviyyədə davam etdirməsinə nail ola bilmir.

İnstitutun rəhbəri Tom Qrinyer bildirib ki, bu böhran həm şagirdlərin, həm də ölkənin gələcəyi üçün təhlükə yaradır. Çünki yüz minlərlə gənc fənni mütəxəssis olmayan müəllimdən öyrənir. Bu isə gələcəkdə elm, texnologiya və mühəndislik sahələrində kadr çatışmazlığına gətirib çıxaracaq.

Məlumata görə, fizika müəllimlərinin çatışmazlığı artıq 30 ildən çoxdur ki, müşahidə olunur. Statistikaya görə, yeni işə başlayan fizika müəllimlərinin 44 faizi ilk beş ildə peşəni tərk edir.

IoP vəziyyətdən çıxış yolu kimi hökumətə 10 il ərzində 120 milyon funt sterlinq həcmində xüsusi proqram həyata keçirməyi təklif edir.

Böyük Britaniya Təhsil Nazirliyi isə bildirib ki, hazırda 6 500 yeni müəllimin işə cəlb edilməsi planı icra olunur, STEM fənləri üzrə müəllim hazırlığına maraq ötən illə müqayisədə 25% artıb. Bununla yanaşı, ixtisaslı müəllimlərin sayını artırmaq üçün vergi güzəştləri və əlavə stimullar tətbiq ediləcək.