Mayın 14-də Azərbaycan Dövlət Neft və Sənaye Universitetində (ADNSU) Azərbaycan Respublikasının Elm və Təhsil Nazirliyi ilə birgə təhsil siyasətinin əsas istiqamətləri üzrə strateji müzakirə görüşü keçirilib. 

Universitetdən “Azərbaycan müəllimi”nə bildirilib ki, görüşdə ADNSU-nun rəhbərliyi, professor-müəllim heyəti, eləcə də Elm və Təhsil Nazirliyinin Elm, ali və peşə təhsili şöbəsinin nümayəndələri iştirak ediblər.

ADNSU-nun rektoru, dosent Rüfət Əzizov iştirakçıları salamlayaraq ali təhsil sistemində həyata keçirilən islahatların və bu kimi görüşlərin əhəmiyyətindən danışıb. O, çıxışında tələbəyönümlü yanaşmalar, rəqəmsallaşma və tədris keyfiyyətinin artırılması istiqamətində universitetdə görülən işlər barədə məlumat verib.

Elm və Təhsil Nazirliyinin Elm, ali və peşə təhsili şöbəsinin müdiri Turxan Süleyman ali təhsildə keyfiyyətin artırılması və strateji hədəflərin reallaşdırılması üçün universitetlərlə əməkdaşlığın vacibliyini vurğulayıb.

Görüşdə hər iki tərəfin nümayəndələri ali təhsilin hazırkı vəziyyəti, tədrisin təşkili və müəllim heyətinin inkişaf ehtiyacları barədə geniş müzakirələr aparıblar. ADNSU-nun rəhbərliyi və müəllim kollektivi ilə fikir mübadiləsi həyata keçirilmiş, tərəfləri maraqlandıran suallar cavablandırılmış, qarşılıqlı əməkdaşlıq imkanları dəyərləndirilmişdir.

İştirakçılar ADNSU-nun elmi-tədqiqat universitetinə çevrilməsi istiqamətində atılmalı addımlar, elmi fəaliyyətin inkişafı, beynəlxalq əməkdaşlıq əlaqələrinin genişləndirilməsi, təhsil infrastrukturunun gücləndirilməsi, inklüziv təhsildə müasir yanaşmaların tətbiqi, ali təhsilin əlçatanlığının təmin edilməsi, əcnəbi tələbələrlə işin təkmilləşdirilməsi, ikili diplom proqramlarının yenilənməsi və məzunların məşğulluğu kimi mövzularda fikir mübadiləsi aparıblar.

Tədbirdə irəli sürülən sual və təkliflər Elm və Təhsil Nazirliyi nümayəndələri tərəfindən cavablandırılıb və bildirilib ki, bu təkliflər hüquqi-normativ bazanın təkmilləşdirilməsi zamanı nəzərə alınacaq.

Sonda tərəflər universitetlərin təklif və ideyalarının dinlənilməsinin təhsilin inkişafına mühüm töhfə verdiyi qənaətinə gəliblər. Görüş iştirakçıları belə əməkdaşlıq platformalarının ali təhsildə keyfiyyətin yüksəldilməsinə ciddi töhfə verəcəyinə ümidvar olduqlarını ifadə ediblər.