İyunun 30-da Mingəçevir Dövlət Universitetində (MDU) 2024/2025-ci tədris ili üzrə ali təhsil müəssisəsini uğurla başa vuran tələbələr üçün “Məzun günü” tədbiri keçirilib.

“Azərbaycan müəllimi” xəbər verir ki, tədbirdən öncə Ümummilli Lider Heydər Əliyevin büstü önünə gül dəstələri qoyulub, dahi şəxsiyyətin əziz xatirəsi ehtiramla yad edilib. Ölkəmizin ərazi bütövlüyü, suverenliyi uğrunda canından keçmiş şəhidlərin xatirəsinin bir dəqiqəlik sükutla anılıb. Tədbir Dövlət Himninin səsləndirilməsi ilə tədbir başlayıb.

Universitetin rektoru Anar Eminov qeyd edib ki, cari ildə 878 tələbə universiteti bitirərək məzun adını qazanıb. A.Eminov bildirib ki, bu gənclər artıq müasir Azərbaycanın gələcəyinə yön verəcək, ölkənin inkişafında fəal rol oynayacaq bir nəslin nümayəndələrinə çevriliblər.

O, MDU-nun yalnız ali təhsil müəssisəsi deyil, həm də regionun elmi-intellektual mərkəzinə çevrildiyini vurğulayıb. Rektor əlavə edib ki, Azərbaycanın bu gün qazandığı nailiyyətlər Ulu Öndər Heydər Əliyevin əsasını qoyduğu siyasi kursa və Prezident İlham Əliyevin rəhbərliyi ilə həyata keçirilən məqsədyönlü inkişaf strategiyasına əsaslanır. Hazırda ölkənin sosial-iqtisadi və elmi-mədəni həyatında mühüm dönüş nöqtələrinin yaşandığı xüsusi vurğulanıb.

Tədbirin fəxri qonaqlarından olan Mingəçevir Şəhər İcra Hakimiyyətinin başçısı İlham İsmayılov qeyd edib ki, bu gün təkcə məzunlar deyil, həm də onların ailələri, müəllimləri və ümumilikdə cəmiyyət üçün bayramdır. O, gənclərə müraciət edərək bildirib ki, bu mərhələ onların həyatında yeni bir başlanğıcdır və burada qazandıqları bilik və dəyərlər onlara düzgün yol göstərəcək. 

Milli Məclisin deputatı Aydın Mirzəzadə isə çıxışında təhsil alan gənclərin cəmiyyətin fəal vətəndaşlarına çevrilməsinin önəmini vurğulayıb, məzunları və onların ailələrini təbrik edib. O bildirib ki, təhsil hər bir cəmiyyətin inkişafını təmin edən əsas sütunlardan biridir və MDU bu baxımdan ölkəmizin regionları üzrə inkişaf strategiyasında mühüm rol oynayan ali təhsil müəssisələrindən biridir.

Azərbaycan Təhsil İşçiləri Azad Həmkarlar İttifaqı Respublika Komitəsi sədrinin müşaviri Elşad Novruzov təhsil sahəsindəki son uğurlardan bəhs edib və MDU-nun bu sahəyə verdiyi töhfələri yüksək qiymətləndirib.

Azərbaycan Tələbə Gənclər Təşkilatları İttifaqının sədri Rəşad Zeynalov çıxışında MDU tələbələrinin ictimai fəallığını və ölkə gənclər siyasətindəki fəal iştirakını önə çəkib. 

Tədbirin rəsmi hissəsində MDU-da müxtəlif illərdə təhsil almış və Vətən müharibəsində qəhrəmancasına şəhid olmuş məzunların xatirəsi ehtiramla anılıb. 

Sonra MDU-da sosial fəaliyyəti ilə seçilən, universitetin ictimai-mədəni həyatında fəal iştirak edən məzunlara təşəkkürnamə və hədiyyələr təqdim olunub. 

Rəsmi hissədən sonra bədii proqramla davam edən tədbir atəşfəşanlıqla başa çatıb.