Azərbaycan Dillər Universitetinin (ADU) Beynəlxalq münasibətlər kafedrası, Doktorantura şöbəsi və Filologiya fakültəsinin birgə təşkilatçılığı ilə “COP 29” layihəsi çərçivəsində “Su resurslarının çirklənməsi: mənbələr, nəticələr və təsirlərin azaldılması strategiyaları” mövzusunda “dəyirmi masa” keçirilib.

Bu barədə “Azərbaycan müəllimi”nə universitetdən məlumat verilib. Bildirilib ki, tədbiri giriş sözü ilə açan Beynəlxalq münasibətlər və regionşünaslıq fakültəsinin dekanı prof. İbrahim Kazımbəyli su resusrlarının əhəmiyyəti, şirin su ehtiyyatlarının insan həyatı üçün böyük əhəmiyyəti ilə bağlı ümumi məlumat verib. Dekan su ehtiyatlarından səmərəli istifadəsinin təmin edilməsi, Azərbaycanda şirin su ehtiyatlarına dair dövlətin siyasəti vacib məsələlərdəndir. 

“Su problemi və qlobal iqlim böhranı” mövzusu ilə çıxış edən Beynəlxalq münasibətlər kafedrasının müəllimi s.ü.f.d.Aytən Ramazanova Şahinovna  bildirib ki, iqlim dəyişikliyi həm su qıtlığını, həm də su ilə bağlı təhlükələri (daşqın, quraqlıq və s) artırır. Bu gün dünyada təxminən iki milyard insanın təhlükəsiz içməli suya çıxışı yoxdur və dünya əhalisinin böyük bir qismi ciddi su qıtlığı yaşayır, həmçinin su qıtlığı, qlobal iqlim dəyişikliyi bütün ekosistemə, insan həyatına, dövlətlərarası münasibətlərə ciddi təhlükələr yaradır.

Daha sonra, dəyirmi masada Beynəlxalq münasibətlər kafedrasının doktorantı Aynur Məmmədova “Dövlətlərin su resursları uğrunda mübarizəsi insan təhlükəsizliyi kontekstində” mövzusu ilə çıxışında bildirib ki,  su qıtlığı dünyada bir çox qarşıdurmaların, müharibələrin başlanmasına səbəb olmuş, Azərbaycanda da şirin su ehtiyyatları ilə problemlərin mövcudluğunu, həmçinin su qıtlığı insan həyatına mənfi təsir etmiş, bir çox xəstəliklərin çoxalmasına (autizm) səbəb olmuşdur.  

Azərbaycan ədəbiyyatı kafedrasının müəllimi Zülfiyyə Nağıyeva “Okean və dənizlərin çirklənməsi;səbəbləri və təsirləri” adlı mövzu ilə ətraflı məlumat verib. Zülfiyyə Nağıyeva həm də bir çox ölkələrdə okean və dənizlərin çirklənməsinin qarşısını almaq üçün istifadə etdiyi texnologiyalar və proqramlar haqqında faydalı məlumatları iştirakçıların diqqətinə çatdırıb.

Tədbirin sonunda Beynəlxalq münasibətlər kafedrasının müdiri prof.Aida Yusifzadə mövzu ilə bağlı fikirlərini bildirib.

Tədbir müzakirələrlə yekunlaşıb.