Ötən tədris ilində uğurlu nəticələri ilə yaddaqalan məzunlardan biri olan Nəzrin Quluzadə həm də qəbul imtahanının nəticələrinə görə IV ixtisas qrupu üzrə Şirvan-Salyan regionunun birincisi olub. 

Qeyd edək ki, Nəzrin Quluzadə 2008-ci ildə Neftçala rayonunda anadan olub. 2014-cü ildə Z. Əsgərov adına Aşağı Surra kənd tam orta məktəbinin 1-ci sinfinə gedib, 2025-ci ildə isə bu məktəbi yüksək göstəricilərlə bitirib.

“Azərbaycan müəllimi” qəzetinin budəfəki qəhrəmanı olan Nəzrin Quluzadə təhsil aldığı müddətdə özünü hər zaman məsuliyyətli və çalışqan şagird kimi göstərib. O, 9-cu sinif buraxılış imtahanında 288, 11-ci sinif buraxılış imtahanında isə 295,6 bal toplayaraq böyük nailiyyət əldə edib. Azərbaycan Tibb Universitetinin “Tibb” ixtisasına qəbul olmağı qarşısına məqsəd qoyan Nəzrin IV ixtisas qrupu üzrə imtahanda 688 bal toplayıb.

Peşə seçimində ən böyük rol oynayan şəxs onun kimya müəllimi, eyni zamanda anası olub.
Nəzrin deyir: “Anam mənə bu peşəni tövsiyə etməklə yanaşı, bütün təhsil yolumda dəstək olub. Valideynlərimin və müəllimlərimin mənə verdiyi stimul və inam uğurlarımın əsas səbəblərindəndir”.

Nəzrin yalnız imtahan göstəriciləri ilə deyil, eyni zamanda fənn müsabiqə və olimpiadalarında qazandığı nailiyyətlərlə də seçilir. O, 7-ci sinifdə Respublika Fənn Müsabiqəsində biologiya fənni üzrə gümüş, 8-ci sinifdə isə Respublika Fənn Olimpiadasında Azərbaycan dili və ədəbiyyat fənni üzrə bürünc medal qazanıb.

Təhsildəki uğurları ona 2025-ci ildə qızıl nişan qazandırıb.

Gələcək hədəflərindən danışan Nəzrin bildirir: "Hər bir şagirdin məqsədləri olmalıdır. Bu məqsədlərə çatmaq üçün isə əzmlə çalışmaq vacibdir".

O, yaşıdlarına və bütün şagirdlərə öz arzularına uyğun peşə seçməyi, seçdikləri sahədə isə uğur qazanmaq üçün çox çalışmağı tövsiyə edir.
Bu gün Nəzrin Quluzadə həkimlik peşəsinə doğru inamla addımlayır və gələcəkdə cəmiyyətə faydalı bir həkim olmaq arzusunu gerçəkləşdirmək üçün əzmlə çalışır. Uğur olsun sənə, Nəzrin!