Peşə təhsili müəssisələrinə tələbə qəbuluna start verilir. Sabahdan başlayaraq, istənilən peşə ixtisası üzrə peşə təhsili müəssisələrinə müraciət etmək mümkündür. Bu yolu keçən və artıq əmək bazarında özünə yer tapan Orxan İsmayılzadə üçün peşə vazkeçilməz bir istəkdir. O, aşpazlığı seçib və bu peşədə böyük uğura imza atıb.

Orxan Turizm və Sosial Xidmətlər üzrə Bakı Dövlət Peşə Təhsil Mərkəzinin məzunudur. Bəs necə olub ki, peşə təhsilini seçib? 
Orxanın sözlərinə görə, bu qərara gələnə qədər ayrı-ayrı yollardan keçib: “Bir çox işlərdə işləmişəm. Çoxu əziyyətli olub. Əlim yatan işlər də olub, təriflənmişəm də. Amma hər zaman düşünmüşəm ki, mən bura aid deyiləm”.

Özünü aid hiss etdiyi yer isə ocaq başıdır: “Aşpazlığa hər zaman həvəsim olub. Qeyri-adi yeməklər hazırlamağı, öz reseptlərimlə tanınmağı arzulamışam. Başqa ölkələrdə məşhur olan aşpazlardan ilhamlanıb onlar kimi olmaq istəmişəm və düşünmüşəm ki, onlar da bir yerdən başlayıblar. Hər halda bu zirvəyə qalxa bilmək üçün peşəkarlığın təməlində məktəb olmalıdır. Mən belə hesab edirəm. Ona görə də özümə məktəb axtarışına başladım. Təhsil haqqından tutmuş müəssisələrin bütün imkanlarını araşdırdım”.

Sosial şəbəkələrdə artıq məzunu olduğu müəssisə haqqında videoçarx görüb: “Videoçarxı izlədikdən sonra əlavə materialları da araşdırdım, müəssisə haqqında məlumat topladım. Məktəbin görünüşü, başqa məktəblərə nəzərən bütün avadanlıqla təchiz olunması xoşuma gəldi və sənədlərimi vermək qərarına gəldim”.

Orxanın fikrincə, təhsil aldığı müəssisə hər yerdən fərqlənir: “Turizm və Sosial Xidmətlər üzrə Bakı Dövlət Peşə Təhsil Mərkəzinin araşdırdığım bütün müəssisələrin hamısından fərqləndiyini gördüm. Əlini atıb tapa bilməyəcəyin bir şey yoxdur. Maraqlı dərslərimiz olub. Reseptlər hazırladıq, onları mətbəxdə tətbiq etdik”.

Peşə təhsilinin üstünlüyünü Orxan çox qısa zamanda anlayıb: “Oxuduğum müddətdə mənə iş seçimləri verdilər. Bu seçimlərin arasında “JW Marriot Abşeron”da işləmə şansı da vardı. Belə ki, praktika vaxtı çatanda bizə bir siyahı təqdim etdilər. Mən “JW Marriot Abşeron”u seçdim. Artıq məzunam və hazırda şef yardımçısı olaraq işləyirəm. Şefimin verdiyi tapşırıqları yerinə yetirirəm. O da mənə nəzarət edir. Bəzən iradlar bildirir, düzəlişlər edir”.

Peşəsinin gözəlliyi isə ondadır ki, eyni reseptə özünəməxsusluq qata bilirlər: “Bir məsələ də var ki, reseptlər eyni olsa da, onlar restorana görə dəyişə bilir. Hər restoranın özünəməxsus qatqıları mütləq olur. Bu baxımdan “JW Marriot Abşeron”da öyrənəcəyim çox şey var”.

Orxan təcrübə keçdiyi məkanda şef yardımçısı kimi işə davam etməyinin səbəbini belə izah edir: “Praktikada fəal işçi olaraq iştirak elədim. 
İşə can yandırdığım üçün şeflərin qərarı ilə işlədiyim sahə - “Pastry” üzrə işə götürdülər. Bu gün düşünürəm ki, yaxşı ki peşə təhsilini seçdim, yaxşı ki, bu müəssisənin şagirdi oldum”.

İndi şef yardımçısı olan Orxan İsmayılzadə Tokioda, Nyu-Yorkda aşpaz işləyəcəyi, yeməklərinin İsveçrədə məşhurlaşacağı günlərin xəyalını qurur.