Azərbaycan Memarlıq və İnşaat Universitetinin (AzMİU) Bina və qurğuların istismarı və rekonstruksiyası kafedrasının təşkilatçılığı ilə universitetin 50 illik yubileyinə həsr olunmuş elmi seminar keçirilib.

Universitetdən “Azərbaycan müəllimi”nə bildirilib ki, seminarda kafedranın müdiri dosent İlqar Əliyev “Paralel qaz kəmərlərinin rekonstruksiyası mərhələsində idarəetmə texnologiyalarının tətbiqində mühəndis yanaşmaları” mövzusunda məruzə təqdim edib.

İlqar Əliyev məruzəsində bildirib ki, tədqiqat işində paralel qaz kəmərlərinin idarəetmə proseslərinə nəzarət etmək üçün qeyri-stasionar qaz axınını əks etdirən riyazi modelin təhlili nəticəsində idarəetmə məntəqəsinin informasiya bazası üçün maşın öyrənməsi texnologiyasına əsaslanan empirik alqoritm işlənib hazırlanıb. İşlənmiş alqoritmin texnoloji idarəetmə sisteminə tətbiqi avtomatlaşdırılmış idarəetmə qərarlarının effektivliyini artıracaq. Hazırlanan hesabat sxemi əsasında mühəndis məsələlərinin həlli üçün nəzərdə tutulan alqoritmlər mövcud paralel qaz kəmərləri sistemlərinin rekonstruksiyası istiqamətində tövsiyə oluna bilər. Bu da paralel qaz kəmərlərinin səmərəli istismarında mərkəzi idarəetmə sistemini təkmilləşdirməyə imkan verəcək.

O aparılan təhlillərə istinadən bildirib ki, paralel kəmərin başlanğıc və son hissələrində təzyiqin dəyişməsi qiymətləri, avtomat kranlarının işə düşmə vaxtından birbaşa asılıdır. Qəza şəraitində paralel qaz kəmərinin zədələnmiş hissələrində klapan sensorları vasitəsilə kranların tez bağlanması nəticəsində zədələnmiş boru şəbəkəsinin əsas hissəsində ayırma prosesi baş verir. Bu ətraf mühitə itirilən qaz itkisini əhəmiyyətli dərəcədə azaldır və texnoloji itkiləri minimuma endirir.

Elmi seminarda iştirak edən kafedranın professor-müəllim heyəti və gənc tədqiqatçılar məruzəçiyə maraqlı suallar verərək yeni yanaşmalarla bağlı öz fikirlərini bölüşüblər.

Qeyd edək ki, belə elmi tədbirlər universitetin tədqiqat sahəsindəki yenilikləri izləməyə və inkişaf etdirməyə yönələn səylərinin bariz nümunəsidir.